Azərbaycanın qadın voleybolçulardan ibarət millisinin baş məşqçisi Ataman Güneyligilin 5 gün əvvəl Yunanıstanın PAOK klubu ilə müqaviləsi ləğv edilib.

Prosport.Az xəbər verir ki, Yunanıstan mətbuatı buna səbəb kimi Saloniki klubunun azarkeşlərinin qəzəblənməsini göstərib. 

Belə ki, Türkiyə Respublikasının qurucusu Mustafa Kemal Atatürk doğulduğu Saloniki şəhərində qəzəblə anılır. Ataman Güneyligilin sosial şəbəkədə Atatürklə bağlı paylaşımlarının olması yunan azarkeşlərinin qəzəbinə və klub rəhbərliyinə təzyiq etməsinə səbəb olub. Bundan sonra klub rəhbərliyi türkiyəli çalışdırıcı ilə bir neçə gün əvvəl bağladığı müqaviləyə xitam verib.

Qeyd edək ki, Ataman Güneyligil ötən ay Azərbaycan Voleybol Federasiyası ilə 3 aylıq müqavilə imzalayıb. O, qadınlardan ibarət millimizi avqustda keçiriləcək Avropa çempionatına baş məşqçi kimi çıxaracaq. Daha sonra PAOK iyunun 10-da sosial şəbəkədə Güneyligilin maraqlı təqdimatını edib. Belə ki, onun "vikipedia" hesabında 2023/24 mövsümündə PAOK-u çalışdıracağı göstərilib.

Onu da bildirək ki, Ataman Güneyligil anlaşdığı klubun adının PAOK olduğunu Prosport.Az-a eksklüziv müsahibəsində bildirmişdi.