“Araz-Naxçıvan”da növbəti ayrılıq yaşanıb.

Prosport.Az xəbər verir ki, Qara Qarayevlə rəsmən vidalaşan “qırmızı-ağlar” bu dəfə legionerlə sağollaşıb.

Əyyub Allaşla aparılan danışıqlar müsbət nəticələnib. Bu ilin əvvəlində klubla 1,5 illik müqavilə bağlayan mərakeşli yarımmüdafiəçi mart ayında zədələnərək uzun müddətə sıradan çıxmışdı.

9 aydır yaşıl meydanlardan kənar qalan Allaşın “Araz-Naxçıvan”la müqaviləsinin müddəti gələn ilin may ayında başa çatsa da, müəyyən təzminat qarşılığında ortaq məxrəcə gəlmək mümkün olub.

Bu barədə xəbəri sportinfo.az-a səbəbkarın özü verib. O, hazırda azad agent statusuna sahib olduğunu bildirib.

27 yaşlı futbolçu “Qəbələ” və “Araz-Naxçıvan”ın formasında meydana çıxdığı 64 oyunda 10 qol və 11 assistlə yadda qalıb.