Məlum olduğu kimi, "Neftçi"nin 3x3 basketbolu üzrə komandası Dünya Qadın Seriyasının Şuşa mərhələsinin qalibi olub.

Prosport.Az-ın Şuşaya ezam olunmuş əməkdaşı baş məşqçi və digər oyunçuların açıqlamalarını təqdim edir:

"Neftçi"nin baş məşqçisi Ratomir Deliç qələbəyə görə xoşbəxt olduqlarını gizlətməyib: "İdmanda nəticəni əvvəldən bilmək olmur. Amma biz istənilən oyuna yalnız qalib gəlmək üçün hazırlaşırıq. Astara mərhələsində yaxşı çıxış edə bilmədik. Çünki hazırlıq üçün vaxtımız az oldu. Mövsüm yenicə başa çatmışdı və aparıcı oyunçularımız yorğun idilər. İki mərhələ arasında fərq oldu. Düşünürəm ki, bu dəfə daha yaxşı oynadıq".

Niderland yığması ilə final matçının (20:12) ən yaxşı oyunçusu seçilən Arika Deris Karter isə həyəcanlı olduğunu vurğulayıb: "Yaxşı hazırlaşmışdıq. Təbii ki, əsas hədəfimiz qalib gəlmək idi. Yaxşı komandalara qarşı oynadıq. Qələbə qazandığımız üçün xoşbəxtəm. Oyunun ən yaxşısı (MVP) seçildiyim üçün həm təəccübləndim, həm də həyəcanlandım. Amma turnir ərzində bütün komanda yoldaşlarım əla çıxış etdilər. MVP seçilməyimdə onların böyük rolu oldu".

Briana Freyzerin qələbə təəssüratları isə belə olub: "Azərbaycanı təmsil etdiyim, burada qalib gəldiyim üçün xüsusi hisslər keçirirəm. Emosiyalar əladır. Hədəf qələbə idi. Həmçinin, komanda kimi necə olduğumuzu görmək istəyirdik. Burada olduğum üçün özümü şanslı sayıram. Mənim üçün yaxşı təcrübə oldu. Artıq deyə bilərik ki, Şuşa bizim üçün uğurlu yerdir".