Gənclər və idman naziri Fərid Qayıbov Şuşada keçirilən 3x3 basketbolu üzrə Dünya Qadın Seriyasının mərhələ yarışını izləyib.
İlk görüşlərdən sonra Fərid Qayıbov jurnalistlər üçün keçirdiyi brifinqdə bəzi məsələlərə aydınlıq gətirib. Prosport.Az-ın Şuşaya ezam olunmuş əməkdaşı həmin brifinqi təqdim edir:
– Əvvəl Astarada basketbol yarışı təşkil olundu, indi isə Şuşada mərhələ yarışı keçirilir. Şuşadakı yarış barədə nə deyə bilərsiniz?
– Şuşada növbəti dəfə beynəlxalq yarış təşkil olunduğu üçün sevinirik. Yenidən Şuşadayıq və burada beynəlxalq tədbir keçiririk. Ötən il bir neçə tədbir baş tutdu. Dünən burada velosiped yarışlarını izlədik. Həmin turnir bitər-bitməz hava şəraiti dəyişdi. Yağış yağdı, külək əsdi və dolu düşdü. Şükür etdik ki, veloyarış başa çatdıqdan sonra bunlar baş verdi. Bütün bunlar 10 dəqiqə tez olsaydı, yarışı tez dayandırmaq məcburiyyətində qalacaqdıq. Amma hər şey yaxşı alındı. Burada küləkdən sonra əsas meydançada müəyyən problemlər oldu. Federasiya əməkdaşlarına təşəkkür edirəm ki, bu yarışın baş tutması üçün əllərindən gələni etdilər. Çox sevinirik ki, Şuşada şahmat və velosipeddən sonra basketbol yarışı da keçirilir.
– İxtisaslaşdırılmış Uşaq-Gənclər Olimpiya Ehtiyatları Futbol Məktəbinin direktoru Kazbek Tuayev işdən çıxarıldı. Onun yerinə təyinat oldumu?
– Təbii ki, hər bir yerə namizəd olduğu kimi onun yerinə də namizəd var və bu, yaxınlarda açıqlanacaq.
– Bəlkə eksklüziv olaraq həmin namizədin adını açıqlayasınız.
– Müəyyən prosedurlar var. Həmin prosedurlardan sonra onun adını rəsmi şəkildə açıqlayacağıq.
– Demək olarmı ki, bu, Kamen Vasilyevdir (hazırda "Zirə"də çalışan bolqarıstanlı mütəxəssis – S.M.) və ya yerli məşqçidir?
– Dediyim kimi, müəyyən prosedurlar var. Gələn həftə həmin adamın adını açıqlayacağıq. Mənə çox maraqlıdır ki, siz niyə görə Kamen Vasilyevin adını çəkdiniz?! Bildirmək istəyirəm ki, Gənclər və İdman Nazirliyi idman üçün çalışır. Siz Mariana Vasilyevanın (nazir müavini – S.M.) həyat yoldaşını nəzərdə tutursunuzsa...
– Bu vəzifəyə Aftandil Hacıyevin də adı çəkilir...
– Yox, mənim qohumlarımın da adı çəkilə bilər. Sadəcə, siz başa düşməlisiniz ki, biz dövlətimiz üçün çalışırıq. Bu barədə çox yazılar yazıldı. Ürəyimdən gəldi ki, sizə deyim ki, biz idman üçün çalışırıq.
– Mövlud Mirəliyev Daxili İşlər Nazirliyinin İdman Cəmiyyətinə rəis təyin olundu. Onun Göygöl Olimpiya İdman Kompleksinin də direktoru olduğunu nəzərə alsaq, direktor vəzifəsindən ayrılacağı gözlənilir...
– Tamamilə doğrudur.
– Artıq vəzifəsindən azad olunub?
– Azad olunması haqda bu haqda əmr imzalanmalıdır.
Səbuhi Musa