Bolqarıstanın paytaxtı Sofiyada keçirilmiş Avropa çempionatında qızıl medal qazanan Azərbaycanın yeniyetmə cüdoçusu Bahadır Feyzullayevin Prosport.Az saytına müsahibəsi
– Ardıcıl 4 dəfə Avropa Kubokunun qalibi olduqdan sonra ilk dəfə qitə çempionluğunu qazandınız. Təəssüratlarınızı bilmək istərdik...
– Bəli, 4 dəfə Avropa Kubokunun qalibi olmuşam. Buna baxmayaraq, məşqlərdə daha aktiv çalışıb Avropa çempionatına hazırlaşdım. Şükürlər olsun ki, qalib gəldim. Qarşıda dünya çempionatı var. Özümə inanıram. Ümid edirəm ki, dünya çempionu da olacağam.
– Ötən il Avropa çempionatında millinin heyətdə yox idiniz. Nə etdiniz ki, bu il heyətə düşməyi bacardınız?
– Keçən il Avropa Kubokunun qalibi olsam da, zədələrə görə digər yarışlarda uğursuzluq yaşadım və Avropa çempionatına vəsiqə qazana bilmədim. Amma bu il tam ciddi hazırlaşaraq istəyimə nail oldum.
– Yarımfinalda komanda yoldaşınız Məhəmmədəli Hüsiyevə qalib gəldiniz...
– Doğrudur, tam üstünlüklə qələbə qazandım. Özümə çox inanırdım. Görüşdə tam aktivlik göstərərək, qızıl xalda ağrıdıcı fəndlə onu məğlub etdim.
– Əvvəllər rəsmi yarışlarda onunla qarşılaşmışdınızmı? Hesab necə olmuşdu?
– Bəli, onunla Almaniyanin paytaxtı Berlində keçirilmiş Avropa Kubokunun finalında da qarşılaşmışdıq. Həmin görüşdə vaza-ari xalı qazandıqdan sonra osaekomi (tutma) fəndi tətbiq etdim və yarışı qızıl medalla başa vurdum.
– Ümumiyyətlə, beynəlxalq yarışlarda öz komanda yoldaşına qalib gəlmək necə hissdir? Avropa çempionatındakı qələbədən sonra Məhəmmədəliyə hansı sözlərlə təsəlli verdiniz?
– Finalda qarşılaşsaydıq, daha yaxşı olardı. Amma reytinqə görə yarımfinalda üz-üzə gəldik. Düzdür, finala çıxmağıma sevinsəm də, həmyerlimi məğlub etmək sevincimi doyunca yaşamağa imkan vermədi. Məhəmmədəliyə dedim ki, 3-cü yer uğrunda rəqibin erməni idmançıdır, onu məğlub edərək Azərbaycanın gücünü göstərməlisən. Komanda yoldaşımın erməni üzərində qələbəsindən stimul alaraq, mən də Avropa çempionu oldum.
– Finalda isə ukraynalı Rostislav Kostrıkini üstələdiniz. Həmin görüş barədə nə deyə bilərsiniz? Sizcə, qızıl medala gedən yolda hansı amil həlledici yol oynadı?
– Finalda üstünlük tam olaraq məndə idi. Real fəndlər edərək fəallıq nümayiş etdirirdim. Həm də rəqibin səhvini gözləyirdim. Amma buna ehtiyac da olmadı. Kostrıkin cüdo qaydalarına zidd hərəkət etdiyi üçün hakim məni qalib elan etdi.
– Hazırda dünya reytinqində 2-ci yerdəsiniz. Avqustda Perunun paytaxtı Limada keçiriləcək dünya çempionatında artıq hamı sizə qarşı ehtiyatlı davranacaq. Bu işinizi çətinləşdirməyəcək?
– Yox, əksinə, bu mənim xeyrimədir. Məşqlərdə daha səylə çalışacağam. Hədəfim dünya çempionatında da Azərbaycan himnini dünyaya dinlətmək, bayrağımızı ən yüksəkdə dalğalandırmaqdır.
– Nəzərə alaq ki, orada yapon cüdoçular da olacaq. Düzdür, Hidayət Heydərov son dünya çempionatında "yapon sindromu"nu qırdı. Amma nəzərə alaq ki, bu ölkənin təmsilçilərinə qarşı görüşlərdə işimiz heç də asan olmur...
– Düzdür, yaponlar cüdoda öz sözlərini desələr də, onlara qarşı görüşlərdə ağlı işə salmaq və xarakter göstərmək lazımdır. Nə vaxtsa yapon cüdoçu ilə qarşılaşsam, öz fəndimi tətbiq edərək qalib gələcəyimə inanıram.
– Yeniyetmələrdə sonuncu ilinizdir. Dünya çempionatında "qapını bərk çırpmağı" düşünürsünüzmü?
– Bəli, bu il dünya çempionlunu hədəfləyirəm. Amma gənclərə keçdikdən sonra çəkimi dəyişəcəyəm. Fiziki hazırlıq və texnikamın üzərinde çalışacağam. Orada da yaxşı nəticələrlə addımlamağı düşünürəm.
– Hazırda reytinqdə 1-ci Nihad Məmişov, 2-ci sizsiniz. Dünya çempionatında yaxşı nəticə göstərsəniz, onu keçə bilərsiniz?
– Dünya çempionatına qədər onu xalı azalacaq. Çünki yarışın 1 ili tamam olanda xalların yarısı silinir. Bundan sonra isə mən reytinqdə 1-ci pilləyə qalxacağam.
Vasif Şükür