Azərbaycan İdman Veteranları İttifaqının təşkilatçılığı ilə uzun illər Azərbaycan idmanının inkişafına xidmət etmiş, “Bədən Tərbiyəsi və İdman Xadimi”, Milli Paralimpiya Komitəsinin sabiq baş katibi, 1996-cı ildən etibarən ardıcıl 6 Paralimpiya Oyunlarında nümayəndə heyətinin rəhbər müavini olmuş Afiq Süleymanovun 70 illik yubileyinə həsr olunmuş tədbir keçirilib.

Prosport.Az xəbər verir ki, tədbirdə idman federasiyalarının prezidentləri və nümayəndələri, idman mütəxəssisləri, dünya, paralimpiya və Avropa çempionları, KİV nümayəndələri və yubilyarın qonaqları iştirak edib.

Tədbir şəhidlərimizin əziz xatirəsini 1 dəqiqəlik sükutla yad etməklə başlayıb. Sonra mərasimin aparıcısı Vüsal Qurbanov qonaqları A.Süleymanovun keçdiyi zəngin həyat yolu ilə ətraflı məlumatlandırıb. İlk təbriki isə Azərbaycan idmanının ağsaqqalı, Azərbaycan İdman Veteranları İttifaqının sədri Yaşar Məmmədov edib. Yaşar müəllim yubilyar üçün xüsusi hazırlanmış plaketi A.Süleymanova təqdim edib. Ona möhkəm can sağlığı, özündən nümunə götürərək 90-100 illiyini qeyd etməyi arzulayıb.

Növbəti təbriki isə yubilyarın uzun illər çalışdığı Milli Paralimpiya Komitəsi edib. Mətbuat xidmətinin rəhbəri Fərid Qarazadə komitə rəhbərliyinin təbrik məktubunu oxuyaraq  Afiq müəllimə təqdim edib.

Sonra “Sportsman” jurnalının A.Süleymanovun fotoşəkillərindən hazırladığı slayd ekranda nümayiş olunub. Nümayişin ardınca “Sportsman” jurnalından daha bir hədiyyə – üz səhifədə Prezident İlham Əliyevin Afiq müəllimə “Tərəqqi” medalını təqdim etdiyi fotoşəkil olmaqla jurnalın yeni buraxılışı yubilyara təqdim edilib. Jurnalın baş redaktoru Rəşad Qəmərşahoğlu veteran mütəxəssisi təbrik edərək onunla xatirə şəkli çəkdirib.

MMA və Qrapplinq Federasiyasının prezidenti Azad Əsgərov, güləş üzrə beynəlxalq dərəcəli hakim Hicran Şərifov, dünya və paraolimpiya rekordçumuz Oloxan Musayev və digər idman ictimaiyyətinin nümayəndələri də çıxış edərək A.Süleymanovun 70 yaşını təbrik edib.

Sonda Afiq Süleymanovun iştirakı ilə ad günü tortu kəsilib.