AFFA-nın Oyunçuların Statusu və Transferi Komitəsi "Neftçi" İdman Klubunun (İK) lehinə qərar çıxara bilər.

Bu barədə "Neftçi" İK-nın İdarə Heyətinin sədr müavini və İdarəetmə aparatının rəhbəri Sadıq Sadıqov Prosport.Az saytına açıqlamasında deyib:

"İş günü deyildi deyə, qərarın çıxarılması ləngidi. Amma AFFA-nın müvafiq komitəsi bu barədə bizim lehimizə qərar çıxarmalıdır. Çünki biz iranlı futzalçılarla bağladığımız müqavilələri AFFA-ya təqdim etmişik. Orada müqavilə müddəti göstərilib və biz o müddətdə futzalçılara olan borclarımızı ödəmişik. Müqavilə öhdəliklərində onların iddia etdiyi kimi nəqliyyat və ev kirayəsi xərcləri nəzərdə tutulmayıb".

AFFA-nın Oyunçuların Statusu və Transferi Komitəsinin üzvü Seymur Səlimli isə rəsmi qərar çıxmamış bu barədə danışmağının düzgün olmadığını bildirib.

Qeyd edək ki, ötən mövsüm "Neftçi" ilə futzal üzrə Yüksək Liqada bürünc medallar qazanmış 4 futzalçı – Əmir Şocayi, Soruş Heydəri, Rza Abqun və Əlirza Bayat maaşlarının bir hissəsinin və digər xərclərin qarşılanmasını istəyir. Onlar ümumilikdə "Neftçi"dən 13 850 AZN pulun alınması üçün mayın 17-də AFFA-nın Oyunçuların Statusu və Transferi Komitəsinə müraciət edib.