"Biz Kəramət Hüseynovu yığmadan uzaqlaşdırmamışdıq. Sonuncu keçirdiyimiz mətbuat konfransında dediyim kimi, onun nizam-intizamı ilə bağlı tədbir görüləcəyini demişdim. Tədbir də ondan ibarət oldu ki, onun adını 25-27 may tarixlərində Avstriyada keçirilmiş Qran Pridəki  siyahıdan çıxardıq".

Bunu Prosport.Az saytına açıqlamasında Azərbaycan Cüdo Federasiyasının baş katibi Rəşad Rəsullu deyib.

Ötən ay nizam-intizam problemi olduğu üçün federasiya rəhbərliyinin tənqidinə məruz qalan cüdoçumuz Kəramət Hüseynov 66 kq çəki dərəcəsində milli komandada çıxış etmək hüququ əldə edib. 2021-ci ilin dünya və Avropa 3-cüsü olan 24 yaşlı idmançı 16-18 iyunda Qazaxıstanda, 23-25 iyunda Monqolustanda keçiriləcək "Böyük Dəbilqə" yarışlarında mübarizə apara bilər.

Federasiyanın baş katibi artıq Kəramətin nizam-intizamının düzəldiyini bildirib: "Artıq baş məşqçi Rixard Trautman onunla şəxsən danışıb. Hələ ki nizam-intizamı düzəlib. Hazırlıqlara intizamlı şəkildə gəlir, məşqçilərin tapşırıqlarını yerinə yetirir. Ona görə də Astana və Ulan-Batorda bu ay keçiriləcək "Böyük Dəbilqə" turnirlərinin ilkin siyahısına adı təqdim olunub. Sabah heyətə baxılıb qərar veriləcək. Növbəti həftə isə Qazaxıstandakı yarışa kimlərin gedəcəyi tam dəqiqləşəcək. Bir problem olmasa, Kəramət hər iki turnirdə iştirak edəcək".

Qeyd edək ki, Kəramət Hüseynov 7-14 may tarixlərində Qətərin paytaxtı Dohada keçirilmiş dünya çempionatını buraxmışdı.

Səbuhi Musa