"Neftçi" İdman Klubunun İrandan olan futzalçıları AFFA-nın Oyunçuların Statusu və Transferi Komitəsinə müraciət edib.

Prosport.Az-ın xəbərinə görə, bunların arasında futzal millimizin üzvü Əmir Şocayi də var.

Ümumilikdə 4 futzalçı – Əmir Şocayi, Soruş Heydəri, Rza Abqun və Əlirza Bayat klubun onlara çatacaq pullarını verməməsindən şikayətçidir. Belə ki, Şocayi klubdan 4 min (2 aylıq maaş), Heydəri 3 min (2 aylıq maaş), Abqun 3 min (2 aylıq maaş) və Bayat 1500 manat (1 aylıq maaş) pulun onlara verilməli olduğunu bildirir. Bundan başqa, qarşı tərəfdən yaşadıqları Nəsimi rayonu, Rəşid Behbudov küçəsi, ev 77/A, mənzil 14-ün kirayə haqqının (750 AZN), Bakıya gəlmək üçün gediş haqqı və məşqə gedib-gəlmək üçün taksi pulunun (1600 AZN) ödənilməsini istəyir. Ümumilikdə, "Neftçi" 13 850 AZN verməməkdə ittiham olunur.

Futzalçıların iddiasına görə, "Neftçi" İK onlarla bağlanan müqavilənin nüsxəsini oyunçulara verməkdən imtina edib və onlara idman formalarını geri qaytarmaq üçün sənəd imzalanıb. Onlar klubun İdarə Heyətinin sədr müavini və İdarəetmə Aparatının rəhbəri Sadıq Sadıqovla görüşməyə cəhd etsələr də, görüşə şərait yaradılmayıb. Bu idmançıların oturum vizalarının müddəti başa çatıb, deport olmamaq üçün məcburiyyətdən pullarını almadan Azərbaycanı tərk ediblər. Məsələ ilə bağlı qarşı tərəfin fikrini öyrənməyə çalışacağıq.

Qeyd edək ki, "Neftçi" İK ötən mövsüm Azərbaycan çempionatının bürünc medallarını qazanıb. Şikayətçilərdən Rza Abqun 57 qolla çempionatın bombardiri olub.