"Azərbaycanın idman növü üzrə Beynəlxalq Çövkən Federasiyasının bayrağı altında ilk rəsmi yarışda toplaşmaq sevindiricidir".

Prosport.Az xəbər verir ki, bu sözləri Beynəlxalq Çövkən Federasiyasının prezidenti Bəhruz Nəbiyev bu gün Bakıda start götürən dünya çempionatının açılış mərasimindən sonra jurnalistlərə açıqlamasında deyib.

Qurumun növbədənkənar Baş Assambleyasının keçirildiyini diqqətə çatdıran B.Nəbiyev burada bir sıra vacib qərarların təsdiq olunduğunu söyləyib: "İclasda bir sıra məsələlər müzakirə olundu. İlk olaraq federasiyaya üzv ölkələrin sayı artırıldı. Bu o deməkdir ki, biz artıq böyük bir ailəyik. Assambleyada qərar verildi ki, dünya çempionatı 2 ildən bir cüt illərdə keçirilsin. Qitə çempionatları isə 2 ildən bir tək illərdə təşkil olunacaq. Həmçinin bu gün iclasda əsas məsələlərdən biri də beynəlxalq çövkən qaydalarının qəbul olunması idi. Artıq federasiyaya üzv olan bütün ölkələr tərəfindən qəbul olunmuş qaydalar var ki, bunlar yalnız Azərbaycanda keçirilən turnirlərə şamil olunurdu".

O, Argentina, ABŞ, Avstraliya kimi ölkələrin bu yarışda iştirak edə bilməməsini belə izah edib: "Bizdə komanda sayı ilə bağlı limit vardı. Bir sıra ölkələrə müraciət etmişdik. Kim ilk olaraq cavab verdisə, onlar bu dünya çempionatına dəvət olundu. Müsbət cavab verən ilk 9 milli bu dünya çempionatında yarışır. Bununla yanaşı, dünya çempionatında iştirak edəcək ölkələrin sayını artırmaq üçün də işlər görüləcək".

Bəhruz Nəbiyev Azərbaycanın 2025-ci ildə keçiriləcək Avropa çempionatına ev sahibliyi edib-etməyəcəyi ilə bağlı suala da aydınlıq gətirib: "Bu məsələyə sabah baxılacaq. Federasiyamızda regional komitələr fəaliyyət göstərir. Onların hər birinin sədri var. Bu şəxslər həmin regionda baş tutacaq bütün məsələlərə cavabdehdir. Sabah Assambleyanın 2-ci günüdür. Əsas mövzumuz, təbii ki, qitə çempionatları olacaq. Əgər Azərbaycan tərəfi Avropa çempionatına maraq göstərərsə, buna müsbət yanaşılacaq".

Qeyd edək ki, 10 ölkədən komandaların iştirak etdiyi dünya çempionatına iyunun 16-da yekun vurulacaq.