Bakıda çövkən üzrə dünya çempionatının açılış mərasimi keçirilib.

Prosport.Az xəbər verir ki, Binə Atçılıq Mərkəzində baş tutan tədbirdə Azərbaycan Respublikası Atçılıq Federasiyasının (ARAF) yeni I vitse-prezidenti Bəsirət Quliyev ölkədə atçılığın inkişafı və güclü idmançıların yetişdirilməsi baxımından yarışın əhəmiyyətindən bəhs edib. "Bakı Taxıl" ASC-nin də rəhbəri olan Quliyev bildirib ki, Azərbaycanda keçirilən mötəbər turnirlər milli at cinslərinin dünya miqyasında tanınmasında və çövkənin təbliğatında böyük rol oynayır. Vitse-prezident iştirakçı ölkələrin dünya çempionatında idman, dostluq, sülh nümayiş etdirəcəklərinə inandığını diqqətə çatdırıb.

Beynəlxalq Çövkən Federasiyasının prezidenti Bəhruz Nəbiyev isə çövkənin yalnız idman növü deyil, qədim tariximizin bir parçası olduğunu vurğulayıb. Rəsmi çıxışlardan sonra dünya çempionatı açıq elan olunub.

Sonra Azərbaycan Dövlət Himni səsləndirilib. Bədii hissə ilə davam edən mərasimdə iştirakçı komandaların atlı paradı baş tutub. Daha sonra Azərbaycan və Qazaxıstan komandaları arasında açılış qarşılaşması start götürüb.

Qeyd edək ki, 10 ölkədən komandaların iştirak etdiyi dünya çempionatına iyunun 16-da yekun vurulacaq.