İtaliyanın paytaxtı Romada keçirilən atletika üzrə Avropa çempionatında Azərbaycan atleti Anna Skidan finala vəsiqə qazanıb.

Prosport.Az xəbər verir ki, ölkəmizi çəkic atma yarışında təmsil edən Anna Skidan bu gün təsnifat mərhələsində mübarizə aparıb. Atletimizin göstəricisi 68.80 metrə bərabər bərabər olub. Bu nəticə ilə Ukrayna əsilli idmançı Avropa çempionatının final mərhələsinə yüksəlib.

Azərbaycanı Olimpiadada təmsil edəcək Anna Skidan 11-ci idmançı kimi finala vəsiqə qazanıb. Onun finaldakı rəqibləri Katrine Kok Yakobsen (Danimarka), Sara Fantini (İtaliya), Roz Loqa (Fransa), Zalina Marqyeva (Moldova), Anita Vvodarçık, Malvina Kopron, Katajına Furmanek (hər üçü Polşa), Silya Kosonen (Finlandiya), Nikola Tatill (İrlandiya), Reka Dyuratç (Macarıstan) və Ana Pöçes (Böyük Britaniya) olacaq. 

Bu mərhələyə vəsiqə qazanan idmançılar sabah Bakı vaxtı ilə saat 23:33-dən etibarən qalibləri müəyyən etməyə çalışacaq.

Üçtəkanla tullanmada çıxış edən Aleksis Kopelyo isə finala vəsiqə qazana bilməyib. Kuba əsilli idmançının ən yaxşı nəticəsi 16.44 metr uzunluğa tullanma olub. Bu nəticə onu 13-cü edib. 38 yaşlı idmançını finaldan cəmi 1 pillə ayırıb.