Heydər Əliyevin anadan olmasının 100 illik yubileyinə həsr olunmuş "Əziz Şuşa” beynəlxalq velosiped yarışında İsveçrə və Ruanda komandaları iştirak etməyəcək.

Prosport.Az xəbər verir ki, buna səbəb hər iki komandanın maliyyə problemi səbəbindən Azərbaycana gəlməməsidir.

Bu gün təşkil edilən mətbuat konfransında AVF-nin baş katibi Elnarə Musayeva media nümayəndələrinə velotur haqqında ətraflı məlumat verib. 

O, qeyd edib ki, Beynəlxalq Velosiped İttifaqının (UCI) 2023-cü il üçün müəyyənləşdirdiyi təqvim planına daxil edilən 2.2 kateqoriyalı, 5 mərhələli yarışda Azərbaycan, Bolqarıstan, Rumıniya və Türkmənistan milli komandaları, həmçinin Türkiyə, Niderland, Qazaxıstan, Almaniya, Monqolustan, Misir, Filippin, Belçika, Çin və İtaliya klubları iştirak edəcəklər. Bu ölkələrdən Qazaxıstan və Almaniya 2 klubla təmsil olunacaqlar. Ümumilikdə 14 ölkədən 16 komandanın heyətində 100-ə yaxın idmançı medallar uğrunda mübarizə aparacaq.

Baş katib bildirib ki, velotur Bakıdan start götürməklə mərhələlər üzrə ölkəmizin bir çox regionlarını əhatə edəcək. Velosipedçilər yarışın sonuncu finişini Azərbaycanın mədəniyyət beşiyi olan Şuşada keçəcək. E.Musayeva belə mötəbər yarışı işğaldan azad olunmuş ərazilərimizdə – Şuşada keçirməyin çox qürurverici olduğunu vurğulayıb.

Konfransda məlumat verilib ki, yarışa sabah Bakının Səbail rayonunda yerləşən Veloparkdan start veriləcək. İlk mərhələdə velosipedçilər 150 km məsafə qət edərək Şamaxı rayonunda finiş xəttini keçəcəklər. İdmançılar iyunun 8-də Qəbələ - Şəki - Qəbələ marşrutu üzrə 176,2 km, iyunun 9-da Qəbələdən Gəncə şəhərinin mərkəzinə qədər 170 km, iyunun 10-da Gəncədə təyin olunmuş marşrut üzrə dövrə vurduqdan sonra Göygöl Milli Parkına qədər 102,9 km, iyunun 11-də isə Beyləqandan Şuşa şəhərinə qədər 134,9 km məsafədə yarışacaqlar.