II Liqada "Baku Sportinq" klubu ilə çempion olmuş futbolçu Hüseyn Axundovun Prosport.Az saytına müsahibəsi
– Mövsümün ortasında "Baku Sportinq"ə transfer olundunuz. Gəlişinizdə komandanın I Liqaya iddiası nə dərəcədə rol oynadı?
– Komanda yeni yığılanda da baş məşqçi Elman Sultanov tərəfindən mənə təklif gəlmişdi. Sadəcə, bəzi səbəblərdən komandaya qoşula bilmədim. Mövsümə "Füzuli" komandası ilə başladım. Ancaq qış fasiləsində "Baku Sportinq"dən gələn təklifi dəyərləndirdim. Təbii ki, hansı komandaya gəldiyimi, məqsədimizin nədən ibarət olduğunu bilirdim. Zatən mən gələndə komanda 1-ci yerdə idi. Komanda qış fasiləsinə, səhv etmirəmsə, 11 xal fərqlə yollanmışdı. Şükür Allaha, çempion olub I Liqaya vəsiqə qazandıq.
– Komandada qalmağı planlaşdırırsınız?
– Müqaviləm artıq başa çatıb. Ancaq hələ klubla bu barədə söhbətimiz olmayıb. Bu barədə klub rəhbərliyi və məşqçilər qərar verəcək. Ona görə də qalıb-qalmayacağımla bağlı dəqiq söz deyə bilmərəm.
– Minifutbol çempionatında "Odlar Yurdu" komandası ilə medalları son anda itirdiniz, bu dəfə qızıl medal qazandınız. Ümumiyyətlə, böyük futbol və minifutbolda birgə olmaq necə hisslərdir?
– Nə qədər minifutbol olsa da, böyük futbolun yerini, təbii ki, vermir. Burada da məşqlər elə idi ki, bizim o biri işlərimizə mane olmurdu. Qeyd etdiyiniz kimi, orada 3-cü yeri əldən versək də, burada qazandığım qızıl medal daha yaxşıdır (gülür).
– 3-cü yer uğrunda matçda "Real Bakı" komandasının kapitanı Cəmşid Məhərrəmov idi. "Rəvan"da komanda yoldaşı idiniz, burada rəqib...
– Ümumiyyətlə, o çempionatda hər komandanın tərkibində sabiq peşəkar futbolçuları görmək olar. Vaxtı ilə komanda yoldaşı olsaq da, həmin matçda rəqib idik. Mənim tək Cəmşidlə yox, digər futbolçularla da münasibətlərim həmişə normal olub. Hazırda minifutbola böyük futboldan axın çoxdur. Bu da çempionatın baxımlılığını artırır.
– "Real Bakı" ilə oyunda qapıçı kimi çıxış etdiniz. Belə ilk təcrübəniz idi?
– Qapıçımız yox idi. Biri zədəli idi, digərinin də II Liqada oyunu vardı. Mən də o matçda çərçivədə yox, futzaldakı kimi oynayan qapıçı kimi çıxış etməliydim. Təbii ki, mən qapıçı deyiləm. Ola bilsin ki, buraxdığım 3 qolda səhvim olsun. Ancaq bacardığım qədər komandaya kömək etməyə çalışdım.
Səbuhi Musa