"Bakıda keçiriləcək çövkən üzrə dünya çempionatında iştirakı dəqiqləşmiş ölkələr Azərbaycan, Polşa, Türkiyə, Nigeriya və Mərakeşdir. Lakin biz Argentina, Avstraliya, ABŞ və Almaniyadan da iştirak üçün müsbət cavab gözləyirik. Qeyd etdiyim bu ölkələr Beynəlxalq Çövkən Federasiyasına üzv ölkələrdir".

Bunu Prosport.Az-a Beynəlxalq Çövkən Federasiyasının prezidenti Bəhruz Nəbiyev bildirib.

O, 10-16 iyunda Bakıda 8 komandanın iştirakı ilə keçiriləcək ilk rəsmi çövkən üzrə dünya çempionatında yeni qaydaların komandalara təqdim olunacağını qeyd edib: "Bu ölkələr əvvəllər də polo üzrə yarışlarda iştirak etdiklərindən, onlar üçün çövkən üzrə dünya çempionatında mübarizə aparmaq problem olmayacaq. Çünki polo ilə çövkənin fəlsəfi eynidir, sadəcə olaraq, qaydalarda fərqlilik var. Biz dünya çempionatının ilk günü – 10 iyunda səhər çövkənin yeni qaydalarını komandalara təqdim edəcəyik. Günortadan sonra başlayacaq yarış da məhz bu qaydalar əsasında keçiriləcək".

Bəhruz Nəbiyev çövkənin ilk beynəlxalq mötəbər yarışına qitə yox, dünya çempionatı səviyyəsində start verilməsinin səbəbini də açıqlayıb: "Yarış ilk dəfə Avropa yox, dünya çempionatı şəklində ona görə keçirilir ki, hər qitədə çox komanda yoxdur. Bu səbəbdən üzv olan 21 ölkə içərisindən dünya çempionatı təşkil olunacaq. Ancaq reqlamentə görə, dünya və qitə çempionatları hər 2 ildən bir keçiriləcək".

Qeyd edək ki, ötən ilin noyabrında Bakıda çövkən üzrə dünya çempionatı keçirilsə də, ilk rəsmi yarış builki sayılacaq. Çünki məhz bu il fevralın 1-də Beynəlxalq Çövkən Federasiyası təsis olunub. Azərbaycan Respublikası Atçılıq Federasiyasının baş katibi Bəhruz Nəbiyev həmin qurumun prezidenti seçilib. Polşalı Matsey Olbrix isə baş katib təyin olunub.  

Səbuhi Musa