"Kamran Süleymanov və Vüqar Talıbov bu dünya çempionatında debüt edəcək".

Bu sözləri Prosport.Az saytına açıqlamasında Azərbaycan Cüdo Federasiyasının icraçı vitse-prezidenti Rəşad Rəsullu sabah Birləşmiş Ərəb Əmirliklərinin paytaxtı Əbu-Dabidə start götürəcək dünya çempionatı barədə danışarkən deyib.

O bildirib ki, Kamranın yarışa aparılması onun bu ay Qazaxıstandakı "Böyük Dəbilqə" turnirində 3-cü yeri tutması ilə əlaqəli deyil: "O, ötən il Avstriya Qran-prisində gümüş, bu ilin yanvarında Portuqaliya Qran-prisində bürünc medal qazanmışdı. Düzdür, Qazaxıstanda 3-cü yer uğrunda Ruslan Paşayevə qalib gəlməsi onun şansını müəyyən qədər artırdı. Ancaq onun heyətə daxil edilməsinin +100 kq-da Uşanqi Kokaurinin yarışa aparılmaması ilə birbaşa əlaqəsi var. Məşqçilər heyəti bu çəkidə idmançımızın performansının yaxşı olmaması səbəbindən Kokaurini aparmamaq qərarı verdi. Bu səbəbdən də bizdə 1 boş yer qaldı (maksimum 9 idmançı mübarizə apara bilər – red.). Həmin yer üçün 66 kq-da Kamrana şans vermək qərarı verildi. Təbii ki, 73 kq-da Rəşid Məmmədəliyevə də şans vermək olardı. Ancaq təəssüf ki, o, Qazaxıstanda ilk görüşdə ayağı burxularaq zədələndi, hazırda müalicə alır. Uşanqinin aparılmama səbəbini açıqladım. Həm də o Olimpiya Oyunlarına lisenziyanı təmin edib. Digər idmançıların onu keçməsi qeyri-mümkündür. Qadınlarda 52 kq-da Aydan Vəliyeva və Gültac Məmmədəliyevanın bu ay Düşənbə "Böyük Dəbilqə" yarışında zədələnməsi bu çəkidə idmançımızın dünya çempionatında olmamasına gətirib çıxardı".

Federasiya rəsmisi medal sayı ilə bağlı proqnoz vermək istəməyib: "Amma 11 idmançımızdan da medal gözləyirik".

Rəsullunun sözlərinə görə, icraçı vitse-prezident seçilsə də, baş katib vəzifəsini icra etməkdə davam edir: "Yaxın zamanda da baş katib vəzifəsinə yeni təyinatın olacağı gözlənilmir".

Qeyd edək ki, dünya çempionatı mayın 19-23-də təşkil olunacaq. Turnirdə 100-dən çox ölkədən 700-ə yaxın idmançı mübarizə aparacaq.