Bu gün və sabah Gürcüstanın paytaxtı Tbilisidə paracüdoda Paralimpiya Oyunlarına lisenziya xalları verən son Qran-pri keçiriləcək. 

Prosport.Az-ın xəbərinə görə, yarışda 3 idmançımız çıxış edəcək. Kişilərin mübarizəsində Vüqar Şirinli (-60 kq), qadınlarda isə Xanım Hüseynova (-70 kq) və Dürsədəf Kərimova (+70 kq) bacıları ölkəmizi qonşu ölkədə təmsil edəcək.

Kənan Abdullaxanlı (+100 kq) və digər 2 paralimpiya çempionumuz – Sevda Vəliyeva (57 kq) və Şahanə Hacıyeva (48 kq) turnirdə mübarizə apara bilməyəcək. Buna səbəb idmançılarımızın Tokio Paralimpiya Oyunlarından sonra xeyli dəyişikliklər edilən görmə məhdudiyyətinin yoxlanıldığı tibbi təsnifat qaydalarından keçə bilməmələridir.

İdmançılarımız Antalyada olduğu kimi, Tbilisiyə də tibbi təsnifata Milli Paralimpiya Komitəsinin oftalmoloqunun müşayiəti ilə yollansa da, yalnız digər 2 paralimpiya çempionu olmuş bacılar üçün müsbət cavab verilib.

Xatırladaq ki, tibbi təsnifatdan keçə bilməyən 3 idmançımız ötən ay Antalyadakı yarışa da eyni səbəbdən buraxılmamışdı.