Böyük futbolda millimizin sabiq yarımmüdafiəçisi olmuş Cəmşid Məhərrəmov artıq gücünü minifutbolda sınayır. O, 2019-cu ilin dekabrında AFFA Region Liqasında "Uğur" komandasında çıxış edərkən futboldan ömürlük uzaqlaşdırılıb. Ancaq Məhərrəmov 2 gün əvvəl minifutbol üzrə Azərbaycan çempionatında kapitanı olduğu "Real Bakı" komandası ilə 3-cü olmağı bacardı.

Prosport.Az 40 yaşlı futbolçudan müsahibə götürüb.

– Azərbaycan Minifutbol Federasiyasının təşkil etdiyi çempionatda debüt etdiniz və ilk ilinizdə bürünc medal qazandınız...
– Çempionatın təşkilatçılığında başda federasiya prezidenti Orxan Məmmədov olmaqla hamıya təşəkkürümü bildirirəm. İlk gündən sonadək hər şey yüksək səviyyədə təşkil olunmuşdu. Öz komandamızla bağlı onu deyə bilərəm ki, iddialılar sırasında idik, çempionluğa oynayırdıq. Ancaq yarımfinalda "Aznur" komandasına uduzduq. Ancaq şükürlər olsun ki, "Odlar Yurdu"na 3:1 qalib gələrək medalsız qalmadıq. "Birbaşa Bakı"nı da çempionluq münasibəti ilə təbrik edirəm, onlara Çempionlar Liqasında uğurlar arzulayıram.

– Sizin kimi böyük futboldan minifutbola gələnlər çempionata nə dərəcədə rəng qatır?
– Təmkin Xəlilzadə çempionatda cari mövsümün ən yaxşı oyunçusu seçildi. Hamısı futbolu bilən adamlardır, çempionata rəng qatırlar. "İnter" komandası adı altında veteran futbolçularımız da bu mövsüm burada çıxış etdi, onların hər birinə də təşəkkürümü bildirirəm. Qısa müddət qalmış çempionatda çıxış etmələri dəqiqləşdi. Təəssüflər olsun ki, onlar pley-off mərhələsinin ilk oyunlarında məğlub oldu. İnanıram ki, gələn mövsüm də çıxış edərlər.

– Ancaq onların yer tuta bilməməsi də onu göstərir ki, böyük futbolda çıxış etmiş hər oyunçu minifutbolda uğur qazana bilməz...
– Əlbəttə. Burada sadəcə uyğunlaşmaq lazımdır. Yenə deyirəm, bu mövsüm "İnter" üçün də bir praktika oldu. Növbəti mövsüm daha uğurlu çıxış edərlər.

– Böyük futbol üçün darıxırsınızmı?
– Əlbəttə. Darıxıram (gülür). Amma mənim üzərimdə cəza qalmaqdadır.

– O vaxt AFFA İntizam Komitəsinin qərarından apellyasiyaya müraciət etmədiniz. Bəlkə indiki yeni AFFA rəhbərliyinə futbola qayıtmağınız üçün müraciət edəsiniz?
– Hələ ki bu barədə düşünməmişəm və oraya müraciət etməmişəm.

– Millimizin sabiq futbolçusu kimi kənardan 10 komandalı çempionatımız necə görünür?
– Əvvəla, vaxtından erkən çempionluğa görə "Qarabağ" komandasını təbrik edirəm. "Qarabağ"ı çıxmaq şərtilə, çempionatda rəqabət eyni səviyyədədir. 2-ci və 3-cü yerlər uğrunda maraqlı, gərgin oyunlar gedir. Belə başa düşürəm ki, AFFA rəhbərliyi də çempionatda komanda sayını artırmağı çox istəyər. Sadəcə, AFFA-nın yeni prezidenti Rövşən Nəcəf də açıqlamasında bildirdi ki, bəzi amillər say artımına imkan vermir. İnanıram ki, qarşıdakı mövsümlər üçün komanda sayı artırılar. Bunun Azərbaycan futboluna və milli komandamıza faydası var. I və II Liqada da maraqlı oyunlar gedir. "Qaradağ Lökbatan"la "Şamaxı" arasında I Liqa çempionu olmaq üçün maraqlı matç olacaq. Hər iki komandaya uğurlar arzulayıram. II Liqada da "Baku Sportinq" komandası çempion oldu. Orada da "Füzuli, "Şahdağ Qusar" və "Cəbrayıl" arasında 2-ci yeri tutmaq üçün gərgin mübarizə gedir.

Səbuhi Musa