Bu il yaranmasının 100-cü ildönümünü qeyd edən Beynəlxalq İdman Mətbuatı Assosiasiyasının (AIPS) yubiley konqresinə ev sahibliyini İspaniyanın Barselona əyalətinin qədim Kataloniya kurort-şəhəri Santa Suzana edib. 

Prosport.Az xəbər verir ki, Aralıq dənizi sahilində qərar tutan, əsrarəngiz gözəlliklər məskəni dünyanın fitnes və bodibildinq paytaxtı kimi də tanınır.

Aprelin 28-dən mayın 2-dək Santa Suzanadakı 5 ulduzlu "Atzavara Hotel&Spa" məkanında keçirilən idman jurnalistlərinin beynəlxalq qurumunun 86-cı konqresi maraqlı məqamlarla yaddaşlara həkk olunub.

Konqresdə ölkəmizi Azərbaycan İdman Jurnalistləri Assosiasiyasının (AİJA) təsisçiləri və prezidenti əməkdar jurnalist Eldar İsmayılov, 1-ci vitse prezidenti, beynəlxalq qurumun Avropa bölməsi İcraiyyə Komitəsinin üzvü Nərgiz Mahmudzadə təmsil edib. Tanınmış idman mütəxxəssisi, bu sahəyə aid çoxsaylı kitabların müəllifi Kazım Əliyevin yaratdığı və uzun illərdən bəri fəaliyyət göstərən “İgid” Güləş Klubu mətbuat xidmətinin rəhbəri Azər Əliyev isə konqresdə ilk dəfə müşahidəçi statusu ilə iştirak edib.

Rəsmi açılış mərasimində Santa Suzanann valisi Joan Kampolyer nümayəndələri salamlayıb, dünya idman jurnalistlərinin belə bir mötəbər ali forumunun onun 1976-cı ildən bəri – düz 48 il rəhbərlik etdiyi doğma şəhərində baş tutmasından iftixar hissi keçirdiyini bildirib.

Daha sonra Beynəlxalq Fitnes və Bodibildinq Fedarasiyasının prezidenti Rafael Santoxa, Beynəlxalq Tələbə İdmanı Federasiyasının (FİSU) prezidenti Leonz Eder, LAUREUS Dünya İdman Mükafatları rəhbəri, idman əfsanəsi Edvin Mozes, FIFA prezidenti Canni İnfantino, AIPS prezidenti Canni Merlo nümayəndəlıəri salamlayaraq  yubiley konqresinin işinə uğurlar arzulayıb.

4 gün davam edən konqres maraqlı çıxışlar, təqdimetmələr, panel müzakirələr, görüşlərlə yadda qalıb.

Konqres çərçivəsində AIPS qitə birliklərinin illik toplantıları da diqqət çəkib. İdman Mətbuatı üzrə Avropa İttifaqı AIPS EUROPE Baş Assambleyasında təşkilatın İcraiyyə Komitəsinin üzvü, Kembric Universitetinin təhsildə peşəkar inkişaf kvalifikasiyaları üzrə proqram rəhbəri, AIPS EUROPE-un sosial platformalarda hesablarına məsul Nərgiz Mahmudzadə də illik hesabat verib.