"Azərreyl"in qadınlardan ibarət voleybol komandasının türkiyəli baş məşqçisi Cengiz Akarçeşmənin Prosport.Az saytına müsahibəsi

– Azərbaycanda çempion oldunuz. Çempionluğu kimə həsr edirsiniz? 
– Çempionluq üçün çox xoşbəxtik. Gərgin matç keçdi. Setlərdən də bilinir ki, "Abşeron"la oyun çətin keçdi. Bu qələbənin 23 Aprel – Milli Suverenlik və Uşaq Bayramı gününə təsadüf etməsi də bizi sevindirdi. Bu, Mustafa Kemal Atatürkün türk və dünya uşaqlarına ərməğan etdiyi bir bayramdır. Bu qələbəni bütün dünya uşaqlarına həsr edirik. Həmçinin, Azərbaycan və Türkiyə şəhidlərinin xatirəsini ehtiramla yad edirik.

– Hamının düşündürən bir sual var. Siz avrokuboklara da bu komandanı çıxaracaqsınız?
– Yeni müqavilə bağlayacağıq kimi görünür. Mən burada işləməkdən rahatam. Avrokubokda uğur bir az maliyyəyə və transferlərə bağlıdır. Transfer etsəniz, uğurlu ola bilərsiniz. Ancaq daimi uğur qazanmaq üçün uşaqları yetişdirib onları milli komandaya cəlb etmək lazımdır. Bununla bağlı federasiya cox ciddi işlər görür. 3 min gənc voleybolda yoxlanıldı. Yoxlanışdan sonra bunun sayı 60-a endirildi. Aralarında boyu hündür və fiziki cəhətdən yaxşı olan qızlar var. Azərbaycan voleybolunda gələcəyə ümidlə baxmağa dəyər.

– Siz özünüzü burada yad hiss etməzsiniz. Yəqin ki, federasiyanın vitse-prezidenti və yığma komandanın baş məşqçisi Faiq Qarayevlə əvvəldən tanışlığınız vardı...
– Əlbəttə. O, "Vakıfbank"da işləyərkən, mən də o komandanın aşağı yaş qruplarında idim. Bura gəlişimdə onun da rolu olub. Bura bizim də Vətənimizdir. Özümüzü xarici ölkədə olmuş kimi hiss etmirik.

– Avrokubokda çıxış etmək üçün transferlər lazımdır. Gedənlər və gələcək oyunçularla bağlı nə deyə bilərsiniz?
– Çox ciddi klublarla müqavilə bağlayan oyunçularımız var. ABŞ və Rusiyaya gedənlər oldu. Ancaq gələnlər də olacaq. Bütün transfer məsələləri ilə bağlı rəhbərliklə söhbət edəcəyik. Hər şey maliyyəyə bağlıdır.

Səbuhi Musa