Bakıda dünən başa çatan taekvondo üzrə dünya çempionatını rekord sayda insan izləyib.

Prosport.Az xəbər verir ki, bu barədə Ümumdünya Taekvondosu məlumat yayıb.

Belə ki, 21,7 milyon insan TikTok sosial şəbəkəsində #Baku2023wtc haştaqı ilə paylaşım edib. 1,6 milyon insan isə TikTok üzərindən də yayımlanan 7 gün davam edən yarışa baxıb.

Qeyd edək ki, bu yarışda 144 ölkədən 1000-ə yaxın idmançı yarışıb. 9 ölkə (Koreya, Türkiyə, Xorvatiya, Fransa, Böyük Britaniya, İran, Fil Dişi Sahili, Macarıstan, İtaliya) nümayəndələri 16 ədəd qızıl medala sahib çıxıb.

10 nəfər ilk dəfə dünya çempionu olub. 31 idmançı isə ilk dəfə dünya çempionatının mükafatına yiyələnib. Onların əksəri 24 yaşdan aşağı olub.

Onu da xatırladaq ki, bu yarışda 3 mərhələdən keçərək yarışa buraxılmış Rusiya və Belarus idmançılarından ibarət 23 nəfərlik Beynəlxalq Neytral Atletlər komandası da iştirak edib. Onlar 1 qızıl, 1 gümüş və 5 bürünc medal qazanmaqla faktiki olaraq ümumi turnir cədvəlini 5-ci sırada başa vurublar. Həmçinin, 13 nəfərdən ibarət Qaçqınlar komandası da yarışıb. Bunların içərisində Yəhya Əl-Qotani İordaniyanın Əzraq şəhərində yerləşən qaçqın düşərgəsindən qoşulan ilk idmançı olub.