"Bu cür yarışlar idmançıların hazırlıq səviyyələrinin arıtırılması baxımından vacibdir".

Prosport.Az xəbər verir ki, bunu gənclər və idman naziri Fərid Qayıbov Ulu Öndər Heydər Əliyevin anadan olmasının 101-ci ildönümünə həsr edilən akademik avarçəkmə, kayak və kanoe üzrə “Prezident Kuboku 2024” beynəlxalq reqatası barədə jurnalistlərə açıqlamasında deyib.

O, turnirdə iştirakçı ölkələrin sayının artmasının ürəkaçan olduğunu bildirib: "Belə olanda mübarizə də artır. Federasiyanı təşkilatçılığa görə təbrik edirəm. Yarış hər zaman olduğu kimi yüksək səviyyədə təşkil edilir. Artıq bizim avarçəkmə idman növündə olimpiadaya lisenziyamız da var. İnanıram ki, növbəti Olimpiya Oyunlarında lisenziyalarımızın sayı artacaq. Burada iştirak edən idmançıların sayının növbəti ildə daha da çox olacağına ümid edirəm. Nəinki Mingəçevirdə, həmçinin Bakıda bu idman növünün bir bölməsi açılıb. Planda digər region və şəhərlərimizdə də kanoe və avarçəkmə üzrə bölmələrin açılması nəzərdə tutulub".

Fərid Qayıbov həmçinin "Paris-2024" Yay Olimpiya Oyunlarına Azərbaycan millisinin hələlik 18 lisenziya qazanmasına münasibət bildirib: “Təbii ki, çox da ola bilərdi. Üç və ya dörd lisenziya artıq ola bilərdi. Amma yenə də idmançılarımız mübarizə aparırlar. Bir neçə idman növündə proses gedir və bu bir ay ərzində tamamlanacaq. İdmançılarımıza fürsətdən istifadə edərək uğurlar arzulayıram. Bir az çətindir. İdmanımızda da müəyyən proseslər gedirdi. Bu yeni nəslin gəlməsi ilə bağlıdır. Yerli idmançılar çoxalır. İnanıram ki, 2028-ci ildə keçiriləcək Olimpiya Oyunlarında daha çox idmançımız iştirak edəcək".

Qeyd edək ki, “Prezident Kuboku 2024” beynəlxalq reqatası bu gün başa çatacaq.