Bakının 2026-cı il üçün dünyanın idman paytaxtı olması üçün namizədliyi irəli sürülüb.
Prosport.Az xəbər verir ki, bunu Gənclər və İdman Nazirliyinin İdman şöbəsinin müdiri Elnur Məmmədov Bakı şəhərinin dünyanın idman paytaxtına namizədliyi ilə bağlı keçirilən mətbuat konfransında deyib.
O, Milli Gimnastika Arenasında keçirilən tədbirdə Azərbaycana gələn qonaqların Bakını gəzdiklərini və adət-ənənələrimizlə yaxından tanış olduqlarını bildirib: "Sevindirici haldır ki, Bakının dünyanın idman paytaxtı ilə bağlı namizədliyini irəli sürməsi müsbət qarşılanıb. Hətta bununla bağlı kitab dərc olunub".
Avropa İdman Paytaxtları Assosiasiyasının (ACES Europe) ispaniyalı baş katibi Uqo Alonso isə bunları deyib: "Şəhərinizdə möhtəşəm qonaqpərvərlik gördüm. Burada olduğumuz üçün şadıq. Mən və komandamızın digər üzvləri adından deyə bilərəm ki, paytaxtınız idman şəhəri kimi tanınır və irəli sürülən namizədliyin qəbul olunması üçün hər cür şərait mövcuddur. Məqsədimiz dünya paytaxtlarına idman dəyərlərini qatmaqdır. Biz Milli Gimnastika Arenasında və Azərbaycan Cüdo Federasiyasının təlim-məşq bazasında olduq, çox xoşumuza gəldi. Burada əvvəllər I Avropa Oyunları keçirilib. Ona görə də Bakı namizəd kimi təsdiqlənməyə yaxındır. Bunu yaxın günlərdə (böyük ehtimalla, mayda – red.) biləcəyik. Təsdiqlənsə, dekabrda seçki yolu ilə qalibin adı açıqlanacaq".
Qeyd edək ki, UNESCO-nun rəsmi tərəfdaşı olan və mənzil-qərargahı Belçikanın paytaxtı Brüsseldə olan ACES Europe dünyanın idman paytaxtlarından əlavə, Avropanın idman regionu, idman paytaxtı, idman şəhəri, idman adası, idman cəmiyyəti, idman qəsəbəsini seçir. 2019-cu ildə Əbu-Dabi (BƏƏ), 2020-2021-ci illərdə Qvadalaxara (Meksika), 2022-ci ildə Madrid (İspaniya), 2023-cü ildə Konya (Türkiyə), 2024-cü ildə Sofiya (Bolqarıstan) və 2025-ci ildə Monako (Monako Knyazlığı) dünyanın idman paytaxtı olaraq müəyyən edilib.
Həmçinin, 2019-cu ildə Gəncə Avropanın 18 idman şəhərindən 1-i seçilib.
Bununla əlaqədar ölkəmizdə səfərdə olan Dünya İdman Paytaxtı Mükafatı üzrə Qiymətləndirmə Kommisiyasının nümayəndələri Bakıda bir sıra idman qurğularının fəaliyyəti ilə maraqlanıb. Səfər çərçivəsində qonaqlar Su İdmanı Sarayı, Avropa Oyunları Parkı, Dənizkənarı Milli Park, Cüdo üzrə Təlim-Məşq Mərkəzi, Bakı Kristal Zalı, Mərkəzi Park, Respublika Olimpiya Mərkəzində olub. Onlar həmçinin “Ocaq” İdman Klubunun, “Gənclik Sağlamlıq” İdman Kompleksinin, Milli Gimnastika Arenasının, Milli İdman Tibb və Reabilitasiya Elmi-Praktiki İnstitutunun fəaliyyəti ilə də tanış olub.
Nümayəndə heyəti "Böyükşor" parkı, "Dreamland" və Bakı Olimpiya Stadionuna da baxış keçirib.
