Azərbaycan millisinin 2 parateakvondoçusu “Azərbaycan Respublikasının İdman Ustası” dərəcəsinə layiq görülüb.

Prosport.Az xəbər verir ki, Amin Şıxəliyev (63 kq) və İmaməddin Xəlilov (70 kq) Azərbaycan Dövlət Bədən Tərbiyəsi və İdman Akademiyasında təşkil edilən ayın yekunu ilə bağlı görüşdə təltif olunub.

Onlara müvafiq vəsiqə və döş nişanlarını gənclər və idman naziri Fərid Qayıbov təqdim edib.

Avropa və dünya çempionu, Tokio-2020 Yay Paralimpiya Oyunlarının iştirakçısı olan İmaməddin Xəlilov Paris-2024 Yay Paralimpiya Oyunlarına da lisenziya qazanıb. O, öz çəki dərəcəsində dünya reytinqində 1-cidir. Amin Şıxəliyev isə son Avropa çempionatının bürünc mükafatçısıdır.