"Federasiyada müvəqqəti müəyyən çətinliklər var. Bu səbəbdən bu il "Əziz Şuşa" yarışı keçirilməyəcək".

Bunu Prosport.Az-a Azərbaycan Velosiped Federasiyasının (AVF) baş katibi Elnarə Musayeva bildirib.

O, 6-9 iyun tarixlərində keçirilməli olan 4 mərhələli "Əziz Şuşa" velosiped yarışının ləğvinin maliyyə problemlərinə görə olduğunu təsdiqləyib: "Bəli, maliyyə problemlərinə görə yarış baş tutmayacaq. Artıq bu barədə UCI (Beynəlxalq Velosipedçilər Birliyi) texniki baxımdan məlumatlandırılıb".

Elnarə Musayeva 2022-ci ildə təyin olunmuş ukraynalı idman direktoru Oleq Berezovskinin də artıq federasiyada işləmədiyini bildirib: "Hazırda bu vəzifə federasiyada boşdur və ora təyinat olmayıb".

Qeyd edək ki, AVF-nin prezidenti sabiq müdafiə sənayesi naziri, hazırda Azərbaycan Respublikasının Prezidenti yanında Təhlükəsizlik Şurasının katibinin müavini işləyən general-polkovnik Mədət Quliyevdir.