Azərbaycan Milli Paralimpiya Komitəsinin Beynəlxalq əməkdaşlıq və ictimaiyyətlə əlaqələr şöbəsinin rəhbəri Rüfət Hacılı Beynəlxalq Görmə Məhdudiyyətli İdmançılar Assosiasiyasının (IBSA) icraçı direktoru təyin edilib.

Prosport.Az xəbər verir ki, R.Hacılının beynəlxalq səviyyədə məsul vəzifəyə təyinatı IBSA-nın İdarə Heyətinin onlayn formatda keçirilən son iclasında reallaşıb.

Onu da qeyd edək ki, cüdo üzrə paralimpiya çempionu Sevda Vəliyevanın həyat yoldaşı olan Rüfət Hacılı əvvəl də IBSA-da işləyirdi. O, IBSA Prezident ofisinin rəhbəri və IBSA prezidenti İlqar Rəhimovun köməkçisi idi. Rüfət Hacılı həmçinin İlqar Rəhimov Milli Paralimpiya Komitəsinin rəhbəri işləyən vaxt Paris Yay Paralimpiya Oyunlarının Azərbaycan üzrə nümayəndə heyətinin rəhbəri (şef-de-mission) təyin olunub. 

Qeyd edək ki, IBSA özündə 120 ölkədən çox üzvü birləşdirən görmə məhdudiyyətli şəxslərin ən böyük idman təşkilatıdır. Assosiasiya 10 idman növünün koordinasiyası ilə məşğuldur. Bunlardan 3-ü paralimpiya üzrə paracüdo, qolbol və futbol idman növləridir.