29-31 martda Azərbaycan Cüdo Federasiyası (ACF) və Bakı Şəhər Gənclər və İdman İdarəsinin birgə təşkilatçılığı ilə 15 yaşa qədər kiçik yaşlı yeniyetmələr arasında cüdo üzrə Bakı şəhər birinciliyi keçirilib.

Prosport.Az xəbər verir ki, Hövsan qəsəbəsində yerləşən Fövqəladə Hallar Nazirliyinin (FHN) İdman Sağlamlıq Mərkəzində baş tutan yarışda 20 çəki dərəcəsində qaliblər bəlli olub. 3 gün davam edən yarışda Bakının 70 müxtəlif klub, cəmiyyət və idman təşkilatından 841 cüdoçu arasında medalçılar müəyyənləşib.

Ümumi komanda hesabında medalların sayına görə 1-ci yerə 13 nömrəli İxtisaslaşdırılmış Olimpiya Ehtiyatları Uşaq-Gənclər İdman məktəbi, 2-ci yerə 10 nömrəli Uşaq Gənclər İdman Məktəbi, 3-cü yerə isə 8 nömrəli İxtisaslaşdırılmış Olimpiya Ehtiyatları Uşaq-Gənclər İdman Məktəbi layiq görülüb. 30 komanda müxtəlif əyarlı medal qazanıb.

Qeyd edək ki, yarışın əsas məqsədi yeniyetmələr arasında idman vasitəsi ilə sağlam həyat tərzinin formlaşdırılması, həmçinin cüdonun kütləvi təbliğinə və təşviqinə nail olmaqdır. Turnir 31 may – 3 iyunda keçiriləcək 15 yaşadək kiçik yaşlı yeniyetmələr arasında ölkə birinciliyinə seçim xarakteri daşıyır.