Azərbaycan cüdoçusu Rəşid Məmmədəliyev Türkiyənin Antalya şəhərində keçirilən "Böyük Dəbilqə" turnirində gümüş medalla kifayətlənib.

Prosport.Az xəbər verir ki, 73 kq çəki dərəcəsində çıxış edən idmançımız finalda Moldova təmsilçisi Adil Osmanova uduzub.

Qeyd edək ki, Rəşid Məmmədəliyev bu ay 2-ci dəfə finalda Azərbaycan əsilli Adil Osmanovla bacara bilmir. O, martın 9-da Avstriyanın Lints şəhərində keçirilmiş Qran-pridə də bu rəqibinə finalda məğlub olmuşdu.

16:30

Azərbaycan cüdoçusu Rəşid Məmmədəliyev Türkiyənin Antalya şəhərində keçirilən "Böyük Dəbilqə" turnirində finala yüksəlib.

Prosport.Az xəbər verir ki, yarışın 2-ci günündə mübarizə aparan 3 cüdoçumuzdan yalnız 1-i medalı özü üçün təmin edib.

73 kq çəki dərəcəsində tatami üzərinə çıxan Rəşid Məmmədəliyev uyğun ardıcıllıqla Mark Xristov (Bolqarıstan), Kun Hex (Hollandiya), Bayram Kandəmir (Türkiyə), Şahram Əhədov (Özbəkistan) və Umalta Dəmirəli (Türkiyə) məğlub edib. Onun finalda rəqibi Moldovanı təmsil edən Azərbaycan əsilli Adil Osmanov olacaq.

Digər cüdoçularımızdan Vüsal Qələndərzadə ilk görüşdə Keysey Nakanoya (Filippin) qalib gəlsə də, sonra Kiprianos Andreuya (Kipr) məğlub olub. Ömər Rəcəbli (81 kq) isə startda Juau Fernanduya (Portuqaliya) uduzub.

Qeyd edək ki, Azərbaycan cüdoçuları yarışın ilk günündə medal qazana bilməyib. Əhməd Yusifov (60 kq), Ruslan Paşayev və Rəşad Yelkiyev (hər ikisi 66 kq) uğursuz çıxış edib.