Belarusun paytaxtı Minskdə keçirilən "Bizim gələcəyimiz" ("Naşe buduşşee") turnirin qalibi olan "Qarabağ"ın 14 yaşadək komandasında millimizin sabiq futbolçusu Rəşad Sadiqovun oğlu da çıxış edir. Bu yerdə qeyd edək ki, futbolçu kimi "Qarabağ"da da top qovmuş Rəşad Sadiqov cari mövsümdən həmin klubun 16 yaşadək komandasında baş məşqçilik edir.

Onun oğlu İbrahim Sadiqli isə sözügedən turnir ərzində bütün matçlarda, demək olar ki, əsas heyət üzvü kimi çıxış etdi. Prosport.Az indi 2 nömrəli futbolçunun müsahibəsini təqdim edir:

– Çempion olduğunuz Belarus turniri barədə nə deyə bilərsiniz? 
– Bizim üçün çətin turnir idi. Yaxşı mübarizə getdi. Sonda qalib olduq. İnşallah, gələcəkdə də belə turnirlərdə iştirak edərik.

– Yəqin, komanda yoldaşlarınızın 2 fərdi nominasiyaya yiyələnməsi də sizi ikiqat sevindirdi...
– Bəli. Bu, komanda üçün çox qürurverici bir şeydir.

– Nə vaxtdan "Qarabağ"dasınız?
– 4 ildir. 2020-ci ildən "Qarabağ"dayam.

– Atanız karyerası boyunca mərkəz – dayaq yarımmüdafiəçisi olub. Siz özünüz necə oldu ki, müdafiənin sağında çıxış etdiniz?
– Baş məşqçimiz Asif Əlizadə belə məsləhət bilib. Əvvəl mərkəz müdafiəçisi idim. Daha sonra Asif müəllim bizim komandaya baş məşqçi təyin olunandan məni müdafiənin sağına keçirdi.

– Atanız çıxışınız barədə nə deyir?
– Səhvlər hamıda olur. Atam həmişə bunları mənə çatdırır. Turnirdə qalib olduqdan sonra da görüntülü danışdıq, mənimlə fəxr etdiyini bildirdi.

– Görmə ilə bağlı müəyyən problemlərinizin olduğunu bilirəm. Bu, oyunlar zamanı problem yaradır?
– Uzağı görmə ilə bağlı problemim var. İndi linzadan istifadə edirəm. Oyunlar vaxtı gözümə linza taxıram ki, uzaq məsafəni görə bilim. Həkimlər bildirib ki, 18 yaşımdan sonra gözüm yaxşı görəcək.

Səbuhi Musa