Belarusun paytaxtı Minskdə keçirilən "Bizim gələcəyimiz" adlı turnirdə ən yaxşı bombardir "Qarabağ"ın 14 yaşadək komandasının hücumçusu Daniil Rəcəbov seçilib.

Komandasının xüsusən qrupdakı qələbələrində pay sahibi olan futbolçu Prosport.Az-a müsahibə verib.

– Özünüzü təqdim edin...
– Ata tərəfdən ukraynalı, ana tərəfdən azərbaycanlıyam. Anamın soyadını daşıyıram. Atam dünyasını dəyişib. Əvvəlcə pullu komandada oynamışam. Bu, 1 aydan az olub. Daha sonra "Qarabağ" Akademiyasının rəhbərliyində yer alan Rövşən müəllim məni komandaya baxışa dəvət etdi. Bu, 3 il əvvəl olub. Bundan sonra məni komandaya götürdülər və 3 illik müqavilə imzaladım.

– İlk oyunda Sankt-Peterburqun "Lavina" komandasını 6:0 hesabı ilə darmadağın etdiniz. Daha sonra qol vurmaqda çətinlik çəkdiniz. Belarus turnirinin səviyyəsi haqda nə deyə bilərsiniz?
– Minskdə çox yaxşı mübarizə aparan komandalar vardı. Futbol elə oyundur ki, güclü komanda zəif rəqibə qarşı pis hazırlaşsa, uduza bilər. Biz bütün oyunlara ciddi hazırlaşdıq deyə, qalib gəldik.

– BATE-yə qrupda məğlub olmuşdunuz. Finalda onları yenmək üçün motivasiya vardı?
– Bəli. Biz bütünlüklə qələbəyə köklənmişdik. Hesab edirdik ki, biz BATE-dən daha güclüyük və finalda bunu sübut etdik.

– Turnirdə 4 qol və 2 assist etdiniz. Hətta finalda da qapıçı ilə təkbətək çıxdınız, ancaq şansınızı qaçırdınız. Bu barədə nə deyə bilərsiniz?
– Hesab edirəm ki, həmin anı düzgün qiymətləndirmədim. Ona görə də fərqlənə bilmədim.

– İlk dəfə beynəlxalq turnirdə çıxış etdiniz. Bu sizə gələcəkdə nə dərəcədə müsbət təsir edəcək?
– Bu bizim üçün çox böyük təcrübə olacaq. Ümumiyyətlə, həmişə Azərbaycana öz gücümüzü göstərməyə çalışmışıq. Gələcəkdə bu turnir bizə həm futbolda, həm də həyatda çox böyük təsir edəcək.

– "Qarabağ"ın əsas heyətində oynayan futbolçulardan kimə bənzəməyə çalışırsınız?
– Juninyuya. Onun oyun üslubu çox xoşuma gəlir. Çox sürətli oyunçudur, istənilən an vəziyyəti dəyişə bilər.

– Hansı çatışmazlıqlarınız var ki, onların üzərində işləməlisiniz?
– Top qəbulu. Həmin an mənə tələsməmək lazımdır. Ancaq düşünürəm ki, bu, zamanla düzələcək. Bunun üzərində işləyəcəyəm.

Səbuhi Musa