Belarusun paytaxtı Minskdə keçirilən "Bizim gələcəyimiz" adlı turnirdə ən yaxşı oyunçu "Qarabağ"ın 14 yaşadək komandasının sağ cinah vingeri Cavidan Əlizadə seçilib.

Komandasının son qələbələrində pay sahibi olan futbolçu Prosport.Az-a müsahibə verib.

– Minskə builki turnirə gələn Azərbaycan komandalarından heç biri çempion ola bilməmişdi. Amma siz bunu bacardınız...
– Bura ilk gələndə həyəcan vardı. Əlbəttə ki, ürəyimizdə çempion olacağımıza inanırdıq. Bura gəlib bütün gücümüzü ortaya qoyduq, bütün komanda yaxşı oynadı. Son matçlarda artıq əminlik vardı ki, çempion olacağıq.

– 3 qol və 2 assistlə yadda qaldınız. Bəs qrup mərhələsi zamanı turnirin ən yaxşı oyunçusu olacağınızı gözləyirdiniz?
– Açığı, belə olacağını fikirləşməmişdim. Amma turnirin sonlarına doğru bu mükafatın mənə verilə biləcəyini güman edirdim. Bu mükafat mənim üçün ikiqat sevinc oldu. Çempionatda 2-ci yerdə gedirik. İnşallah, bu il çempion olmaq üçün bu turnirin bizə əla təsiri olacaq.

– Qalib gəldikdən sonra evdən sizə zəng edən oldu?
– Bəli. Evdəkilərin hamısı ilə danışdım (gülür). Hamısı təbrik edirdi.

– Klub Akademiyasının koordinatoru Aftandil Hacıyevlə söhbət zamanı məlum oldu ki, "Qarabağ"a bu mövsüm gəlmisiniz. Əvvəl harada çıxış etmisiniz?
– Əvvəl "Leon" komandasında futbola başlamışam. Daha sonra "Səbail"də çıxış etmişəm. Sonra "Baku boys" komandasında oynadım. Onların "Qarabağ"la oyunu zamanı mən bəyənilərək komandaya götürüldüm.

– Əvvəldən ampluanız bu mövqe olub?
– Xeyr. 6-7 il müdafiədə oynamışam. Son 2-3 ildir ki, hücumun sağında çıxış edirəm.

Səbuhi Musa