Azərbaycan Həmkarlar İttifaqları İdman Təşkilatları Assosiasiyasının (AHİTA) prezidenti Nadir Əliyevin Azərbaycan Gənclər və İdman Nazirliyinin (AGİN) Kollegiya üzvlüyündən çıxarılmasının və onu "Azəridmanservis" MMC-nin direktoru Həsən Hüseynovun əvəzləməsinin səbəbi bəlli olub.
Prosport.Az-ın əldə etdiyi xəbərə görə, Əməkdar bədən tərbiyəsi və idman xadimi olan N.Əliyevin 2022-ci ilin avqustundan həbsdə olmasıdır.
Milli Olimpiya Komitəsinin (MOK) Baş Məclis üzvü də olan N.Əliyev Baş prokuror yanında Korrupsiyaya qarşı Mübarizə Baş İdarəsinin əməkdaşları tərəfindən tutulub. Belə ki, AHİTA sədri və “Yasamal” idman-sağlamlıq klubunun direktoru Alik Həsənovun həmin klubun istifadəsində olan keçmiş “Məhsul" stadionu adlanan ərazinin satışı adı altında sahibkarlara məxsus pul vəsaitlərini ələ keçirmələri barədə cinayət işi başlanılıb.
Aparılan istintaqla N.Əliyevin A.Həsənovla qabaqcadan əlbir olaraq Bakı şəhəri, Yasamal rayonu, Həsən bəy Zərdabi prospekti 69D ünvanında 1,26 hektar torpaq sahəsində yerləşən sözügedən stadion ərazisini guya həmin yerdə hündürmərtəbəli binanın inşa edilməsi məqsədi ilə 5 milyon 500 min manata sata biləcəklərini ayrı-ayrı sahibkarlara bildirmələrinə, həmin məsələnin həlli üçün əvvəlcə beh verilməsi, habelə Azərbaycan Həmkarlar İttifaqları Konfederasiyanın rəhbərliyinə (bu qurumun sədri millət vəkili Səttar Möhbalıyevdir – red.) rüşvət qismində çatdırılması adı ilə sahibkarlardan cəmi 900 min manat məbləğində pul vəsaitini aldatma yolu ilə ələ keçirmələrinə əsaslı şübhələr müəyyən edilib.
Bundan başqa, istintaq zamanı A.Həsənovun həmin vəzifədə işləyərkən eyni üsul və məqsədlə direktoru olduğu stadionun ərazisini digər sahibkara 8 milyon manata sata biləcəyini bildirməsinə, bunun üçün aidiyyəti vəzifəli şəxslərə rüşvət verilməsi və müvafiq sənədləşdirmənin aparılması adı ilə sahibkara məxsus 360 min manat məbləğində pul vəsaitini təkrarən ələ keçirməsinə də əsaslı şübhələr müəyyənləşdirilib.
Qeyd edilən hallarla bağlı toplanan ilkin sübutlar əsasında Nadir Əliyev və Alik Həsənova müvafiq olaraq Cinayət Məcəlləsinin 178.4 (xüsusilə külli miqdarda ziyan vurmaqla dələduzluq) və 32.4, 312.1 (rüşvət verməyə təhrik etmə) və 32.4, 312.2-ci (rüşvət verməyə təkrarən təhrik etmə) maddələri ilə cinayət işi başlanılıb. Hazırda hər iki şəxsin məhkəmə işi Bakı Ağır Cinayətlər Məhkəməsində davam etməkdədir.
Qeyd edək ki, Gənclər və İdman Nazirliyinin Kollegiyasına nazir, onun müavinləri, Naxçıvan Muxtar Respublikasının gənclər və idman naziri, AGİN Aparatının rəhbəri, AGİN Aparatının gənclərlə iş şöbəsinin müdiri, AGİN Aparatının idman şöbəsinin müdiri, MOK vitse-prezidenti, Bakı Şəhər Gənclər və İdman İdarəsinin rəisi, Azərbaycan Dövlət Bədən Tərbiyəsi və İdman Akademiyasının rektoru, "Azəridmanservis" MMC-nin direktoru və AGİN regional idarələrinin rəisləri aiddir. "Azərbaycan Gənclər və İdman Nazirliyinin kollegiyasının tərkibi haqqında” Nazirlər Kabinetinin 2006-cı il 14 iyun tarixli 144 nömrəli Qərarına edilmiş dəyişikliyə əsasən üzvlərin sayı 24 nəfər müəyyən edilib.