Gənclər və İdman Nazirliyinin Kollegiyasının tərkibi dəyişib.

Prosport.Az xəbər verir ki, "Azərbaycan Gənclər və İdman Nazirliyinin kollegiyasının tərkibi haqqında” Nazirlər Kabinetinin 2006-cı il 14 iyun tarixli 144 nömrəli Qərarında dəyişiklik edilib.

Bununla bağlı Baş nazir Əli Əsədov “Azərbaycan Respublikasının Gənclər və İdman Nazirliyi haqqında Əsasnamə”nin 16-cı hissəsinə uyğunlaşdırma məqsədilə qərar imzalayıb.

Qərarla Gənclər və İdman Nazirliyinin kollegiyasının tərkibində dəyişiklik edilib. Nazirliyin kollegiya üzvlərinin sayı 24 (iyirmi dörd) nəfərdən ibarət müəyyən edilib.

Bundan başqa, kollegiyanın üzvləri sırasına nazirliyin regional idarələrinin rəisləri əlavə edilib. Azərbaycan Həmkarlar İttifaqları İdman Təşkilatları Assosiasiyasının prezidenti isə “Azəridmanservis” MMC-nin direktoru ilə əvəzlənib.

Qeyd edək ki, “Azəridmanservis” MMC-nin direktoru Həsən Hüseynovdur. Mərhum gənclər və idman naziri Azad Rəhimovun xeyir-duası ilə yaradılmış şirkətə əvvəllər Azərbaycan Triatlon Federasiyasında da prezident olmuş Azər Məhərrəmov rəhbərlik edirdi.

Azərbaycan Həmkarlar İttifaqları İdman Təşkilatları İctimai Birliyinin sədri isə 2006-cı ildən Əməkdar bədən tərbiyəsi və idman xadimi Nadir Əliyev olub.