Azərbaycan Reqbi Federasiyasına prezident seçilən Röyal Süleymanovun kimliyi bəlli olub.

Prosport.Az-ın xəbərinə görə, R.Süleymanov "Azəriqaz"ın əməkdaşıdır.

O, “Azəriqaz” İstehsalat Birliyinin Bakı Regional Qazın Satışı Departamentinin Hüquq şöbəsinin rəisidir. R.Süleymanov 2019-cu ilin oktyabrında təsisçisi olduğu "Proqres Klub"la maraqlı layihəyə imza atması ilə yadda qalıb. Belə ki, onun ideyası ilə ictimai məkanlarda, habelə parklarda, yol kənarlarında, dayanacaqlarda və s. yerlərdə gənclərin maarifləndirilməsi və onların bədii ədəbiyyata marağının artırılması üçün Nərimanov rayonu Nazim Hacıyev 20 ünvanında (Nərimanov Parkının yanı) açıq kitab köşkü istifadəyə verilib. Həmin köşkün açılışında xalq yazıçısı Çingiz Abdullayev də iştirak edib.

Onu da bildirək ki, Röyal Süleymanov reqbiyə yad adam deyil. O, ötən il 2015-ci ildən fəaliyyət göstərən "Qarabağ" reqbi klubunun prezidenti vəzifəsinə təyin olunub.

Federasiyanın I vitse-prezidenti Ernesto Ferlenqi milliyyətcə italyandır. O, İtaliyanın "Eni S.p.A." neft-qaz şirkətinin vitse-prezidenti, neft servisi sahəsində fəaliyyət göstərən "Saypem" şirkətinin region üzrə meneceridir. Ferlenqi "Eni"də Rusiya və Mərkəzi Asiya bazarının rəhbəridir.

Federasiyanın digər vitse-prezidenti Səbuhi Qarayev əvvəlki rəhbərliklərin vaxtında da burada işləyib. O həmin vaxt bölgələr üzrə vitse-prezident vəzifəsində idi. Onu biz Şamaxı Olimpiya Mərkəzinin direktoru və "Qəbələ" İdman Klubunda ümumi işlər üzrə koordinator vəzifəsindən də tanıyırıq.

Əldə etdiyimiz məlumata görə, yaxınlarda federasiyanın daxili toplantısı keçiriləcək. Orada əvvəllər federasiyada inkişaf və KİV üzrə vitse-prezident vəzifəsində işləmiş, həmçinin "Qarabağ" reqbi klubunun təsisçisi və Müşahidə Şurasının sədri olan Eldar Kərimov baş katib təyin olunacaq.

Qeyd edək ki, federasiyanın təsisçisi Zülfüqar Nəbiyev olub. O əvvəllər federasiyanın inzibati məsələlər üzrə vitse-prezidenti vəzifəsində də işləyib. Bu səbəbdən dünənki seçkidə Z.Nəbiyev də çıxış edib.

Səbuhi Musa