Bu gün Azərbaycan Reqbi Federasiyasının növbədənkənar ümumi yığıncağı keçirilib.

Prosport.Az xəbər verir ki, Gənclər və İdman Nazirliyinin inzibati binasında keçirilən tədbir Dövlət Himnimizin səsləndirilməsi ilə başlanıb. Tədbirdə çıxış edən gənclər və idman naziri Fərid Qayıbov yığıncaq iştirakçılarını salamlayaraq onlara uğurlar arzulayıb. 

Yığıncaqda Azərbaycan Reqbi Federasiyasının rəhbər orqanlarına seçkilər keçirilib. Röyal Süleymanov Azərbaycan Reqbi Federasiyasının prezidenti seçilib.

Yığıncaqda həmçinin Ernesto Ferlenq I vitse-prezident, Səbuhi Qarayev vitse-prezident, eləcə də Raqif Hüseynli və Vaqif Səadətxan təşkilatın İdarə Heyətinə üzv seçilib. 

Sonda Röyal Süleymanov, Ernesto Ferlenq və Vaqif Səadətxan çıxış edərək göstərilən etimada görə federasiya üzvlərinə təşəkkür edib və qurumun bundan sonrakı fəaliyyəti, qarşıdakı planları barədə danışıblar.

Qeyd edək ki, Azərbaycan Reqbi Federasiyası 2004-cü ildə yaradılsa da, 2017-ci ilin sentyabrında fəaliyyətini dayandırıb. 2020-ci ilin iyul ayından federasiya Elşən Abbasovun rəhbərliyi altında fəaliyyətə başlayıb. Lakin nazirliklə anlaşılmazlığa görə, qurum yenidən fəaliyyətini dayandırmışdı. Həmin rəhbərliyin vaxtında Səbuhi Qarayev regionlar üzrə vitse-prezident vəzifəsini icra edirdi.