Minsk "Dinamo"sunun 16 yaşadək komandasında (U-16) Nurxan Qasımov adlı azərbaycanlı futbolçu çıxış edir. Bunu Belarusun paytaxtı Minskdə səfərdə olarkən "Dinamo" Akademiyasının direktoru Sergey Pavlyuçuk bizə bildirmişdi.

Ötən ayın 18-i 16 yaşını tamamlayan Nurxan Qasımov "Qarabağ"ın U-15 komandasının Minskdə keçirilən "Bizim gələcəyimiz" adlı turnirdə iştirakını izləyənlər arasında idi. Prosport.Az ondan müsahibə götürüb.  

– Belarusda ilk komandanız hansı olub?
– 6 yaşımdan "Dinamo"da oynayıram. 9-10 ildir ki, artıq buradayam.

– Mövqeyiniz hansıdır?
– İnsayd mövqeyində oynayıram. Dayaq yarımmüdafiəçisi və hücumçu arxasında oynamağı bacarıram. Solaxayam.

– Azərbaycana gedib gəlirsiniz?
– Bəli. 4 dəfə Azərbaycanda olmuşam. Özümüz Samux rayonundanıq. Oranın kəndində olmuşam.

– Azərbaycanda oynamaq, yoxsa karyeranızı "Dinamo"da davam etdirmək istəyirsiniz?
– Karyeramda yüksəliş etmək, fərqli klublara keçmək istəyirəm. Təbii ki, "Dinamo"ya mənə verdiyi əməyə görə ömrüm boyu təşəkkür edəcəyəm.

– "Qarabağ"ın 15 yaşadək komandası Minskdə "Bizim gələcəyimiz" adlı turnirdə iştirak etdi. Atanızla oyunlardan birini izlədiniz. Nəyi bəyəndiniz?
– "Qarabağ"ın futbolçuları daha çox sürətli oynayır, topu özündə çox saxlamır, tez qərar verir. Bir də topu itirdikdən sonra sonadək oynamaları mənim çox xoşuma gəldi.

– Bəs "Dinamo" ilə "Qarabağ" arasında hansı fərq var?
– Biz də bu cür mübarizə aparırıq. Əsas məsələ beyinlə düşünmək, meydançanı görməkdir. Topu özündə çox saxlamamaq lazımdır.

– "Dinamo" ilə əvvəl beynəlxalq turnirlərdə iştirak etmisiniz?
– Bəli. Əvvəl Litva, Latviya, Bolqarıstan, Polşa, Çexiya, Rusiyada oynamışıq. Bolqarıstanda 1-ci, Litvada isə 3-cü olmuşuq. Moskvadakı yarışda mənə turnirin ən yaxşı oyunçusu mükafatı verilib. Həmçinin, hər il ənənəvi olaraq Minskdə keçirilən "Bizim gələcəyimiz" adlı turnirdə iştirak edib, qızıl medalları qazanmışıq.

Səbuhi Musa