Cüdo üzrə Avropa çempionu, ikiqat dünya mükafatçısı Orxan Səfərov Gənclər və İdman Nazirliyi tərəfindən bu ay seçilən 5 idman səfirindən biri oldu.
Prosport.Az idmançı karyerasını 32 yaşında bitirmiş Orxan Səfərovdan müsahibə götürüb.
– İdman səfirinin funksiyası nədən ibarət olacaq?
– Bütün dünyada "ambassador"lar fəaliyyət göstərir. Bizim də əsas məqsədimiz gənclərə özümüzü nümunə göstərərək onları sağlam həyat tərzinə təşviq etmək, idmanın təbliğuni aparmaqdır. Yeni açılmış klub və ya idman zallarına baş çəkib orada idmanın faydalarından danışacağıq, hətta açıq havada gəzməyin belə necə faydalı olacağından bəhs edəcəyik.
– Karyeranızı bitirdikdən sonra Cüdo Federasiyasından hər hansısa vəzifə təklif olunmayıb?
– Xeyr, olmadı. Federasiya daha çox bizim təhsilimizlə bağlı işlər görür. Yaponiyada federasiyanın xətti ilə Rüstəm Orucovla birgə səfərdə olduq. İngilis dili ilə bağlı biliyimizi artırırıq. Psixoloqla komanda üzərində işləmək, liderlik bacarıqlarını üzə çıxarmaq üçün söhbətlər aparırıq. Mayda idmandan ayrıldıqdan sonra dərhal kurslara başladıq. Çünki işə başlamaq üçün hazırlıqlı olmalıyıq.
– Federasiyanın baş katibi Rəşad Rəsulludan dekabrda müsahibə götürərkən, o bildirmişdi ki, Uşanqi Kokauri karyerasını bitirdikdən sonra hakim olmaq istəyir. Bəs siz?
– Məşqçiliyə həvəsim var. Yaponiyada Rüstəm Orucov daha çox idarəçilik, mən isə məşqçilik kursunda oldum. İnşallah, bunun nəticəsi də olar.
– Bəs özünüz zal açmağı planlaşdırırsınız?
– Hələ ki karyeramdan sonra boşluqdur. İdman səfiri olmaqdan başqa fəaliyyətim olmadığı üçün öz akademiyamı açmaq qərarına gəldim. Yaponiyadakı mühiti görüb daha da həvəsləndim. Zalın adı Səfərov Cüdo Akademiyası olacaq. Hazırda orada təmir işləri gedir. Zal Tibb Universitetinin idman kompleksinin içindədir. Təmir işləri bitdikdən sonra açılışı olacaq.
– Çıxış etdiyiniz 60 və 66 kq çəki dərəcələri kənardan necə görünür?
– Bakıdakı "Böyük Dəbilqə"də Balabəy Ağayevlə Yaşar Nəcəfov medal qazandı. Düzdür, bürünc medal oldu. Ancaq elə bizim vaxtda da Bakıda bu çəkilərdə qızıl medal qazana bilmirdik (gülür). Bakıda çıxış etmək çox çətin və məsuliyyətlidir. Həm də olimpiya ili olduğundan, uşaqlar yarışlara daha çox fiziki yüklü çıxır. Bildiyim qədəri ilə, komandamız daha çox Avropa və dünya çempionatına köklənib.
– Sizin vaxtınızda güləşən rəqiblərinizdən bəziləri hələ də tatamiyə çıxır. Balabəy və ya Yaşar sizdən rəqiblərlə bağlı məsləhətlər alırmı?
– Turan Bayramov dostumun tələbəsidir. Bu səbəbdən daha çox onunla fikir mübadiləsi olur. Onunla karyeramın sonlarında otaq yoldaşı da olmuşam. Ona çox şeyi izah edirdim.
Səbuhi Musa