"Sevda Vəliyeva ötən ilin avqustunda Birminqem şəhərində keçirilmiş IBSA Ümumdünya Oyunlarında tibb təsnifatından keçə bilməyib "not eligible" almışdı. Sevda avqustda protest vermişdi. İndi də mən ötən ay Almaniyada Qran-pri yarışından əvvəl eyni situasiya ilə üzləşdim. Həmin yarışdan da 3 ay keçməlidir ki, protestim qəbul edilsin. Bu səbəbdən apreldəki Antalya Qran-prisinə gedə bilməyəcəyəm. İnşallah, qəbul etsələr, Tbilisidə tibbi təsnifatdan keçəcəyəm".

Bunu Prosport.Az-a paracüdo üzrə paralimpiya və Avropa mükafatçısı Namiq Abaslı deyib.

26 yaşlı idmançı Almaniyanın Haydelberq şəhərində keçirilmiş tibbi təsnifatda həkimlərin onu kəsməsinin və yarışa buraxmamasının səbəbini açıqlayıb: "Özüm III qrup əliləm. Gözümdə problem olmasa, ötən Paralimpiya Oyunlarında güləşməzdim. Burada həkim anlaşmazlığı oldu. Güclü idmançılar kəsildi. Mənim çıxış etdiyim çəki dərəcəsində güləşən, reytinqdə 1-ci olan qazaxıstanlı Oljas Orazalyuli də tibbi təsnifatdan keçə bilmədi. Ömür böyu həkimdən heç vaxt kəsilməmişəm. Həmişə gözümdə xəstəlik olduğu üçün yarışlara buraxılmışam. Mənə dedilər ki, gözümə linza taxsam, yaxşı görə bilərəm, hətta maşın da sürə bilərəm. Bu nöqteyi-nəzərdən kəsildim".

J2 kateqoriyası 73 kq-da həm paralimpiya, həm də dünya reytinqində 5-ci yerdə olan Namiq Abaslı həkimlər problem yaratmasa, Parisdə keçiriləcək Paralimpiya Oyunlarına lisenziyanı artıq təmin etdiyini bildirib: "Hazırda məndə vəziyyət yaxşıdır. Bundan sonrakı 2 yarışda iştirak etməsəm belə, Paralimpiya Oyunlarına lisenziyanı təmin etmişəm. Reytinqdə 5-ci sıradayam və məndən arxada olanların xalı ilə mənimki arasında da fərq böyükdür".