Atıcılıq üzrə Dünya Kuboku Azərbaycanın əlindən alınıb.

Prosport.Az-ın xəbərinə görə, Beynəlxalq Atıcılıq İdmanı Federasiyası (ISSF) 2025 və 2026-cı ildə keçiriləcək Dünya Kuboku yarışlarının heç birini Azərbaycana həvalə etməyib.

Bu barədə ISSF-in İcraiyyə Komitəsi qərar qəbul edib.

Qeyd edək ki, artıq hər il ənənəvi olaraq Dünya Kuboku Bakı Atıcılıq Mərkəzində keçirilirdi. Ötən il mayda həm Dünya Kuboku (yalnız güllə atıcılığı üzrə) və həm də avqustda dünya çempionatı Azərbaycanda təşkil olunmuşdu. Bu ilin 1-12 may tarixlərində keçiriləcək Dünya Kuboku da Bakıda baş tutacaq. Sözügedən yarış Bakıda keçiriləcək 7-ci Dünya Kuboku turniri olacaq.

Xatırladaq ki, Azərbaycana atıcılıqda beynəlxalq yarışların verilməsi tarixi 10 il əvvələ gedib çıxır. 2014, 2015, 2016 (yalnız gənclər üzrə) və 2017-ci (yalnız güllə atıcılığı üzrə) illərdə Dünya Kuboku Qəbələ, 2022-ci ildə isə Bakıda təşkil olunub. 

2018-ci ildə Azərbaycanda yarış keçirilməsə də, stend atıcılığı üzrə məşqçilər üçün D kateqoriyalı kurslar Bakıda təşkil olunub. 2020-ci ildə Bakıda keçirilməli olan Dünya Kuboku isə koronavirus pandemiyasına görə ləğv olunub.