Bakıda keçiriləcək paracüdo üzrə Qran-pri yarışının ölkəmizdən alınmasının səbəbi bilinib.

Prosport.Az-ın xəbərinə görə, 15-16 mayda keçirilməli olan yarışı qonşu Gürcüstanın paytaxtı Tbilisi əvəzləyib.

18-19 may tarixlərində baş tutacaq Tbilisi Qran-prisi Paralimpiya Oyunlarına lisenziya xalları verən son yarış olacaq.

Əldə etdiyimiz məlumata görə, əvəzində Bakıdakı Qran-prinin Paralimpiya Oyunlarından sonra – noyabrda keçirilməsi gözlənilir. Bakıdakı yarış isə yeni formatda baş tutacaq. Belə ki, çəki dərəcələrində dəyişikliklər ilk dəfə paytaxtımızdakı yarışda tətbiq olunacaq. Məsələn, artıq qadınlarda 48 kq çəki dərəcəsi olmayacaq. Buna səbəb orada rəqabətin zəif olmasıdır. Əvəzində yeni 52 kq çəki dərəcəsi yaradılacaq. Bu isə indiyədək 57 kq çəki dərəcəsində güləşən paracüdoçuların qüvvələrini burada sınamasına səbəb olacaq.

Qeyd edək ki, IBSA-nın prezidenti İlqar Rəhimov, köməkçisi Rüfət Hacılıdır. Həmçinin, qurumun cüdo üzrə Avropa koordinatoru Elmar Babanlıdır.