Azərbaycanın 2 paracüdoçusu tibbi təsnifatdan kəsilib.

Prosport.Az-ın xəbərinə görə, Paralimya Oyunlarına lisenziya qazanmağa əsas namizəd idmançılarımızdan olan Namiq Abaslı (J2 73 kq) və Sevda Vəliyeva (J2 57 kq) göz tibbi həkim yoxlanışından keçə bilməyib.

Onların gözündə heç bir problem aşkarlanmadığından, idmançılar bu ay Almaniyanın Haydelberq şəhərində keçirilmiş Qran-priyə buraxılmayıb.

Əldə etdiyimiz məlumata görə, Milli Paralimpiya Komitəsi yalnız Paralimpiya çempionumuz olan Sevda Vəliyeva üçün apellyasiyaya müraciət edib. Baxmayaraq ki, paralimpiya mükafatçısı olan Namiq Abaslı öz çəki dərəcəsində reytinqdə 1168 xalla 5-cidir və Paralimpiya Oyunlarına lisenziya qazanmağa yaxındır.

Ondan fərqli olaraq, Sevda Vəliyeva 2 gün əvvəl açıqlanmış reytinqdə yer almayıb. Bunun səbəbi isə Vəliyevanın əsas rəqibləri olan türkiyəli Zeynep Çelik və ukraynalı İnna Sıç da təsnifatdan kəsilib. Onların Paralimpiya Oyunlarına buraxılmayacağı gözlənildiyindən, Sevda üçün son şansdan yararlanılıb.

Çünki apreldə Antalyada və mayda Tbilisidə keçirilən Qran-prilərdə qalib olacağı halda, Sevda Vəliyeva Paralimpiya Oyunlarına lisenziyanı qazanacaq.