"Bu gün mənim üçün çətin gün idi. İlk hərəkəti çətinləşdirmək istəyirdim, amma bəzi səbəblərə görə asanlaşdırdım. Amma final hərəkətimi çox çətin üsulla etdim. Özümdən razıyam ki, qızıl medal qazandım".

Prosport.Az-ın xəbərinə görə, bunu tamblinq üzrə Bakıda keçirilmiş Dünya Kubokunda qızıl medal qazanmış gimnastımız Mixail Malkin deyib.

27 yaşlı dünya çempionumuz 3-7 aprel tarixlərində keçiriləcək Avropa çempionatında da eyni uğuru təkrarlamağa çalışacağını bildirib: "Bundan sonra Avropa çempionatına hazırlaşacağıq. 1 aydan bir az çox vaxt qalıb. Fikirləşirəm ki, həm fərdi, həm də komanda şəklində qızıl medal qazanaram".

Dünya Kubokunda gümüş medal qazanmış Adil Hacızadə isə çıxışından razı qaldığını qeyd edib: "Sözün düzü, bundan daha yaxşısını edə bilməzdim. Dünən pis çıxış etmişdim. Fikirləşdim ki, bu gün çıxışım yaxşı alınar. Yaxşı da oldu. Adrenalin var idi. Çıxışımdan razıyam... Hansı hisslər keçirirəm? Nə hissdirsə, pis deyil (gülür). Portuqaliyanın Qimaraynş şəhərindəki Avropa çempionatında komanda şəklində çıxış edəcəyəm. Orada hərəkətləri bir az çətinləşdirməliyik. Rəqiblərimiz də bizi gördü. Onlar da hərəkətlərini çətinləşdirəcək".