Güc çoxnövçülüyü üzrə Azərbaycan Respublikasının Daxili İşlər Nazirliyinin (DİN) çempionatı keçirilib. 

Prosport.Az xəbər verir ki, yarışın proqramına qol güləşi idman növü və daş qaldırma daxil edilib. 

Tədbirdə DİN İdman Cəmiyyətinin sədri, polis polkovnik-leytenantı Mövlud Mirəliyev, Azərbaycan Qol Güləşi Federasiyasının prezidenti Cəsarət Əhmədov, DİN İdman Cəmiyyətinin İdman-təlim şöbəsinin rəisi, polis polkovnik-leytenantı Eduard Məmmədov və digər rəhbər vəzifəli şəxslər iştirak edib.

Yarışdan öncə Vətən uğrunda canlarını fəda etmiş şəhidlərimizin ruhu bir dəqiqəlik sükutla yad edilib. Daha sonra Azərbaycan Respublikasının Dövlət Himni səsləndirilib.

Tədbirin açılışında DİN İdman Cəmiyyətinin sədr müavini, polis polkovnik-leytenantı Zaur Məcidov və Cəsarət Əhmədov çıxış edib.

Ölkənin bütün regionlarını, eləcə də DİN-in bir çox idarə və struktur bölmələrini təmsil edən 70 nəfərə yaxın polis əməkdaşının iştirak etdiyi yarış gərgin mübarizə şəraitində davam edib. Qaliblərə medallar, diplomlar və qiymətli hədiyyələr təqdim olunub.