"Ardıcıl 3 yarış idi ki, 5-ci yeri tuturdum. Bu medal mənim üçün bu baxımdan sevindirici oldu. Bakıda sindromu qırıb medal qazandım. Burada dəstək çox olur. Adam daha da motivasiyalı olur".

Bunu Prosport.Az-a açıqlamasında Bakıda keçirilən "Böyük Dəbilqə" yarışında bürünc medal qazanmış Balabəy Ağayev deyib.

O bildirib ki, yarımfinalda rusiyalı cüdoçu Ramazan Abdullayevlə parterdə güləşməsi doğru deyildi: "Əslində mən də qızıl medal qazanmaq istəyərdim. Ola bilər ki, mən yarımfinalda düzgün güləşmədim deyə, uduzdum. Rəqibim parterdə güclü idi, mən gərək onunla ayaq üstdə güləşərdim. Qismət belə imiş".

O, bürünc medal görüşündə özbəkistanlı Kəmaləddin Bəxtiyarovla görüş barədə isə bunu bildirib: "Mən orada elə bildim ki, hakim Hansoku verəcək. Çünki başı tatamiyə dəymişdi. Amma hakimlər baxdıqdan sonra ippon verdilər".

Gənc güləşçinin sözlərinə görə, Xorvatiyada keçiriləcək Avropa çempionatında da iştirak edəcək: "Avropa çempionatına mən də, Turan Bayramov da gedəcək. İnşallah, bu il Avropa çempionatında medal da qazanarıq".