Azərbaycan Ağırlıqqaldırma Federasiyasının (AAF) vitse-prezidenti Firdovsi Umudov milli komandanın üzvləri ilə görüş keçirib.

Federasiyadan Prosport.Az-a verilən məlumata görə, o, “ASK Arena”nın təlim-məşq bazasında baş tutan görüşdə atletlərə “Paris-2024” Yay Olimpiya Oyunlarına lisenziya xarakteri daşıyan Avropa çempionatı və Dünya Kuboku, həmçinin digər beynəlxalq yarışlarda uğurlar arzulayıb, onlara inandığını bildirib.

Vitse-prezident qeyd edib ki, ölkədə idmana dövlət səviyyəsində diqqət və qayğı nümayiş etdirilir. Onun sözlərinə görə, AAF da öz növbəsində bu idman siyasəti çərçivəsində atletlərin şəraitinin daima yaxşılaşdırılması istiqamətində işlər görür, hər bir idmançını diqqət mərkəzində saxlayır.

Komanda üzvləri rəhbərliyə təşəkkür edib, bu görüşlərin onlar üçün əlavə motivasiya olduğunu, yığmaya ruh yüksəkliyi verdiyini, yarışlar zamanı böyük dəstək olacağını bildiriblər.