Azərbaycan cüdoçusu Zelim Tçkayev (81 kq) Fransanın paytaxtı Parisdə keçirilən “Böyük Dəbilqə” turnirində gümüş medal qazanıb.

Prosport.Az xəbər verir ki, 24 yaşlı osetin əsilli idmançı yarışda 2-ci yeri tutub.

Mübarizəyə 1/32 finaldan başlayan Zelim Tçkayev Komor adaları, Portuqaliya, Birləşmiş Ərəb Əmirlikləri, Rusiya və Kanadanı təmsil edən rəqibləri üzərində qələbə qazanaraq finala yüksəlib. Lakin o, həlledici görüşdə belçikalı Matias Kaseyə uduzub.

Azərbaycan millisinin digər cüdoçuları Rəşid Məmmədəliyev, İbrahim Əliyev (hər ikisi 73 kq) və Səid Mollayi (81 kq) mükafatçılar sırasına düşə bilməyib.

Qeyd edək ki, yarışa bu gün yekun vurulacaq. Vüqar Talıbov, Elcan Hacıyev (hər ikisi 90 kq) və Uşanqi Kokauri (+100 kq) qüvvələrini sınayacaqlar.