Rusiyanın Perm diyarı Cüdo Federasiyasının azərbaycanlı prezidenti Yakov Hüseynov istefa verib.

Prosport.Az Rusiya mətbuatına istinadən xəbər verir ki, o, səhhəti ilə əlaqədar istefa vermək qərarına gəlib və bundan sonra karyerasını ədliyyə orqanlarında davam etdirəcək.

Rusiya Cüdo Federasiyasının vitse-prezidenti, Perm diyarı Cüdo Federasiyasının sabiq prezidenti Vladimir Plotnikov bu vilayətdə cüdo idman növünün inkişafına verdiyi töhfəyə görə ona təşəkkür edib. Hüseynovu Perm diyarı Cüdo Federasiyasının Qəyyumlar Şurasının üzvü, "Lift-Servis" MMC-nin direktoru və təsisçisi Vladimir Maks əvəzləyib.

Y.Hüseynov sosial şəbəkə hesablarında ayrılığı barədə bunları qeyd edib: "4 illik cüdo üzrə aktiv fəaliyyətimdən sonra Perm vilayətinin Cüdo Federasiyasının prezidenti kimi fəaliyyətimi rəsmən başa vururam. Ümid edirəm ki, bizim işimiz regionda cüdonun gələcək inkişafı üçün əsas olacaq və əminəm ki, bu vəzifəni etibarlı əllərdə qoyuram. Federasiyamızı parlaq gələcək gözləyir və mən onun tərəqqisini səbirsizliklə gözləyirəm. Komandamıza dəstək olan və inanan hər kəsə "çox sağ olun" deyirəm".

Qeyd edək ki, əsl adı Elşad olan Yakov Hüseynov Füzuli rayonunun Horadiz qəsəbəsində doğulub. O, 2020-ci ilin sentyabrında 4 illik müddətə prezident seçilmişdi.