Azərbaycan Pauerliftinq, Stronqman və Qol Güləşi İdman Növləri Federasiyalarının fəaliyyəti artıq Gənclər və İdman Nazirliyi (AGİN) tərəfindən tanınmayacaq.

Prosport.Az-ın əldə etdiyi xəbərə görə, onlara bir federasiya bayrağı altında birləşmək təklif olunsa da, qəbul edilməyib.

Bu səbəbdən də AGİN tərəfindən onsuz da akkreditasiya ala bilməmiş bu federasiyaların fəaliyyət istiqamətləri rəsmi şəkildə Rauf Bünyatəliyevin prezidenti olduğu Azərbaycan Bodibildinq və Fitnes Federasiyasına həvalə edilib. Hər üç federasiya bundan sonra ictimai birlik kimi fəaliyyət göstərsə belə, onların keçirdikləri yarışlar rəsmi yarış kimi tanınmayacaq.

Bu barədə qərar AGİN-in növbəti Kollegiya iclasında verilib. Həmçinin, nazir Fərid Qayıbovun sədrliyi ilə keçən iclasda gündəliyə əsasən, AGİN-in 2024-cü il üçün perspektiv iş planı təsdiqlənib.

Bundan başqa, bir sıra məsələlər müzakirə edilib və müvafiq qərarlar qəbul edilib. İclasda 2024-cü il idman növləri üzrə yığma komandaların, məşqçi və idmançı heyətlərinin siyahısı və 2024-cü il üçün təqvim planı təsdiqlənib. İdman mütəxəssislərinə veriləcək yeni döş nişanları və müvafiq vəsiqələr; "İdman səfiri"nin seçilməsi haqqında Əsasnamə; "İdman obyektləri və avadanlıqlarının standartlaşdırılması" üzrə Texniki Komitənin yaradılması, 2023-2024-cü illər üçün Vahid İdman Təsnifatına atçılıq idman növü üzrə əlavələr və digər məsələlər müzakirə edilərək qəbul olunub. 

2023-cü ildə əldə edilmiş nailiyyətlərə görə istedadlı və yaradıcı gənclərin, həmçinin, "Sabahın alimləri" Xlll Respublika müsabiqəsinin qaliblərinin mükafatlandırılması məsələləri, ali təhsil müəssisələrinin tələbələri arasında "Komando" hərbi-idman oyununun Əsasnaməsi də  Kollegiyada müzakirə edilərək qəbul olunub.