Bakıda keçiriləcək Paris Olimpiadasına lisenziya xalları verən badminton üzrə "Azerbaijan International 2024" turnirinin mükafat fondu bəlli olub.

Prosport.Az-ın xəbərinə görə, turnirin mükafat fondu 15 min dollar təşkil edəcək.

"Sinql" badmintonçularda (fərdi mübarizə aparanlar) qalib 1200 dollar, gümüş medalçı 720 dollar, yarımfinalçılar 300 dollar, 1/4 finala yüksəlmiş idmançılar 120 dollar qazanacaq. "Dabl" badmintonçularda (cütlük halında mübarizə aparanlar) qaliblər 1350 dollar, 2-ci yeri tutanlar 900 dollar və yarımfinalçılar 375 dollar əldə edəcək. Sonuncu kateqoriyada 1/4 finala yüksəlmiş badmintonçulara pul mükafatı verilməyəcək.

8-11 fevral tarixlərində Bakı İdman Sarayında keçiriləcək yarışa giriş fərdi mübarizə aparan hər bir oyunçu üçün 100 avro, cütlük halında mübarizə aparan hər bir badmintonçu üçün isə 75 avrodur. 22 yanvarda yarışda iştirak etməyən istəyənlər üçün son gündür. Bu tarixdən etibarən adı yarışın iştirak ərizəsinə salınmış, ancaq sonrada səbəb göstərilməklə geri çəkilən hər bir idmançıya görə onun məxsus olduğu federasiya 150 dollar kompensasiya ödəyəcək. Səbəbsiz iştirak etməməyə görə cərimə isə 500 dollar təşkil edəcək. Cütlüklər halında mübarizə aparan badmintonçuların bəlli geyim dəstlərində (şort/yubka) uyğunsuzluq aşkar olunarsa, 100 avro cərimə olunacaq.

Yanvarın 23-də isə yarışın püşkatması keçiriləcək. 8 fevralda təsnifat mərhələsi, 9 fevralda təsnifat və ilkin mərhələlər, 10 fevralda ilkin mərhələ və 1/4 finallar, 11 fevralda yarımfinal və finallar keçiriləcək. Təsnifat və ilkin mərhələlərə saat 09:00-da, 1/4 finallara 17:00-da, yarımfinallara 10:00-da və finallara 16:00-da start veriləcək.

Qeyd edək ki, Avropa qitəsi üçün keçirilən bu yarışda kişilər fərdi, qadınlar fərdi, kişilər cütlük, qadınlar cütlük və qarışıq cütlük kateqoriyası üzrə mübarizə gedəcək.