Atletika üzrə millimizin məşqçilər heyətində dəyişiklik olunub.

Prosport.Az xəbər verir ki, Azərbaycan Atletika Federasiyasının (AAF) prezidenti Cavid Qurbanov, qurumun baş katibi Məhərrəm Sultanzadə və İcraiyyə Komitəsinin üzvü Şəlalə Yaqubovanın iştirak etdiyi toplantıda milli komandanın baş məşqçisi Bəhruz Salehli, sprint üzrə məşqçi Tofiq Əliyev və dözümlülük üzrə məşqçi Sadıq Sadıqova uzun illər ərzində atletikamızın inkişafında göstərdikləri əvəzsiz xidmətlərə görə təşəkkür çatdırılıb. 

Qeyd olunub ki, bu mütəxəssislər məsləhətçi kimi fəaliyyətlərini davam etdirəcək.

Sonda milli komandanın 2024-cü il üçün yeni məşqçi heyəti təqdim edilib. Ayrılanların yerinə Hakim İbrahimov baş məşqçi, Valentin Bulıçev sprint üzrə böyük məşqçi və Vüqar Ələsgərov dözümlülük üzrə böyük məşqçi təyin olunub.

Nazim İsrafilov ehtiyat üzrə baş məşqçi, Ziyad Xəlfəyev tullanmalar üzrə böyük məşqçi, Emil Şahtaxtinski atmalar üzrə böyük məşqçi, Anar Yusifov regionlar üzrə böyük məşqçi və Rəhim Xəlilov ehtiyat üzrə məşqçi vəzifəsində işləyəcək.

Qeyd edək ki, 33 yaşlı Daşkənd doğumlu Hakim İbrahimov görmə məhdudiyyətli ikiqat paralimpiya mükafatçısı Yelen Çebanuya Rio-2016-da bələdçilik edib. Çebanunun 100 metr məsafəyə qazandığı gümüş və 200 metr məsafəyə əldə etdiyi bürünc medalda onun bələdçiliyinin də rolu olub. Bu səbəbdən də, Azərbaycan Prezidenti İlham Əliyevin 21 sentyabr 2016-cı il tarixli Sərəncamına əsasən XV Yay Paralimpiya Oyunlarında qazandığı nailiyyətlərə və Azərbaycan idmanında xidmətlərinə görə H.İbrahimov "Tərəqqi" medalı ilə təltif edilib.